IŇLIS DILI DERSI BOÝUNÇA V HALKARA INTERNET OLIMPIADASYNYŇ ÝEŇIJILERINI GUTLAÝARYS
2026-njy ýylyň 10-njy aprelinde Türkmenistanyň Bilim ministrligi hem-de Döwletmämmet Azady adyndaky Türkmen milli dünýä dilleri instituty tarapyndan guralan ýurdumyzyň we daşary ýurtlaryň dil hem-de beýleki ugurly ýokary okuw mekdepleriniň talyplarynyň arasynda iňlis dili dersi boýunça V halkara internet olimpiadasy (IIOE - 2026) geçirildi. Bu halkara çäresi talyplaryň iňlis dili baradaky bilimlerini barlamak, halkara gatnaşyklaryny berkitmek hem-de sanly bilim ulgamy arkaly medeni-ynsanperwer hyzmatdaşlygy ösdürmek maksady bilen guraldy.
Dünýäniň dürli künjeklerinden ýüzlerçe talyp ýaşlary sanly ulgamyň üsti bilen bir ýere jemlän bäsleşik, diňe bir dil baýlygyny däl, eýsem talyplaryň logiki pikirleniş ukyplaryny hem açyp görkezdi. Olimpiadanyň netijeleri boýunça Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakuletiniň 3-nji ýyl talyby Mähri Guzyçyýewa II orna, Halkara žurnalistikasy fakultetiniň 3-nji ýyl talyby Bakyguly Orazow III orna mynasyp bolup Diplomlar bilen sylaglandylar.
Bu halkara bäsleşigi talyplaryň daşary ýurt dilleri özleşdirmäge bolan höwesiniň yzygiderli artýandygyny görkezmek bilen bir hatarda, Türkmenistanyň bilim ulgamynyň dünýä giňişligine işjeň goşulyşýandygynyň nobatdaky subutnamasyna öwrüldi.
Aýna SÄTGELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy.