INSTITUTYMYZYŇ TOPARY BILERMENLER ZEHIN BÄSLEŞIGINDE BIRINJI ORNA MYNASYP BOLDY
«Garaşsyz, baky Bitarap Türkmenistan – bedew batly at-myradyň mekany» ýylynda geçirilen «Türkmenistanyň halkara başlangyçlary: sebit durnuklylygynyň we abadançylygynyň girewi» atly «Bilermenler» zehin bäsleşiginde Türkmenistanyň Daşary işler ministrliginiň Halkara gatnaşyklary institutynyň topary I orna mynasyp boldy. Bäsleşik Magtymguly adyndaky Türkmen döwlet uniwersiteti tarapyndan guraldy.
Ýurdumyzdaky 15 sany ýokary okuw mekdebiniň toparlarynyň gatnaşmagynda geçirilen bäsleşige hukuk öwreniş hünärinden beýleki hünärlerde bilim alýan talyplar gatnaşdylar. Zehin bäsleşigi Birleşen Milletler Guramasynyň Baş Assambleýasynda Türkmenistanyň başlangyjy boýunça «2028-nji ýyl – Halkara hukuk ýyly» atly Kararnamanyň kabul edilmegine bagyşlandy.
Bäsleşigiň esasy maksady hormatly Prezidentimiziň alyp barýan parahatçylyk söýüjilikli daşary syýasatyny, sebitde we dünýäde özara ynanyşmak ýörelgelerini ýaşlaryň arasynda giňden wagyz etmekden ybarat boldy. Bäsleşik döwletimiziň halkara başlangyçlarynyň hukuk esaslarynyň mazmunyny düşündirmäge hem-de halkara hukugy baradaky bilimleri giňeltmäge gönükdirildi.
Şeýle zehin bäsleşikleri talyplaryň halkara gatnaşyklaryna degişli bilimlerini çuňlaşdyrmaga we toparlaýyn işlemek endiklerini ösdürmäge ýardam edýär. Institutymyzyň toparyny gazanan üstünligi bilen gutlap, talyplarymyza okuwda we geljekki bäsleşiklerde täze üstünlikleri arzuw edýäris.
Söýli ÝAZBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby