TÜRKMENISTANYŇ HALKARA BAŞLANGYÇLARYNA BAGYŞLANAN MASLAHAT GEÇIRILDI
2026-njy ýylyň 28-nji oktýabrynda Türkmenistanyň Daşary işler ministrliginiň Halkara gatnaşyklary institutynda Halkara gatnaşyklary we diplomatiýa kafedrasynyň hem-de institutyň «Ýaş alymlar» geňeşiniň guramagynda «Türkmenistanyň Birleşen Milletler Guramasynyň Baş Assambleýasynyň 81-nji sessiýasyna gatnaşmagy we onda öňe sürlen teklipler mynasybetli» atly ylmy-döredijilik maslahat geçirildi.
Maslahaty institutyň Halkara hukugy we deňeşdirme hukuk öwreniş kafedrasynyň mugallymy Gülsenem Hommadowa alyp bardy. Onda Türkmenistanyň Daşary işler ministrliginiň «Türkmenistanyň daşary syýasaty we diplomatiýasy» žurnalynyň redaksiýasynyň redaktory Töfe Hoşanowa, Türkmenistanyň Magtymguly adyndaky Ýaşlar guramasynyň Merkezi Geňeşiniň Halkara hyzmatdaşlygy bölüminiň hünärmeni Dünýägözel Baýmyradowa, Halkara ynsanperwer ylymlary we ösüş uniwersitetiniň mugallymy Arslan Çaryýew hem-de institutyň mugallymy Muhammet Bäşimow dagylar çykyş etdiler.
Çykyşlarda BMG-niň Baş Assambleýasynyň 81-nji sessiýasynyň çäklerinde ýurdumyzyň dünýä parahatçylygy, durnukly ösüşi, ulag-energetika ulgamyny we ekologik hyzmatdaşlygy berkitmäge gönükdirilen birnäçe möhüm we täze halkara başlangyçlary hem-de teklipleri barada nygtaldy. Şeýle hem ýurdumyzyň daşary syýasatynda aýratyn orny eýeleýän ynsanperwer hyzmatdaşlyk ugrunda zenanlaryň we ýaşlaryň bähbitlerine gönükdirilen dialogyň, halkara hyzmatdaşlygyň ähmiýeti barada bellenildi. Mundan başga-da, sanly tehnologiýalary ösdürmekde Türkmenistanyň halkara gatnaşyklarda hem-de diplomatiýada emeli aňy parahatçylykly peýdalanmak boýunça BMG-niň howandarlygynda halkara kodeksi işläp taýýarlamak teklibine aýratyn üns berildi.
Maslahatyň ahyrynda oňa gatnaşyjylar Watanymyzyň Garaşsyzlygyny berkitmek we ýurdumyzda giň gerimli özgertmeleri amala aşyrmak ugrunda döredilýän mümkinçilikler üçin Gahryman Arkadagymyza hem-de hormatly Prezidentimiz Arkadagly Gahryman Serdarymyza tüýs ýürekden hoşallyk sözlerini beýan etdiler.
Rahym AKMURADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň mugallymy