«ÝAŞ TELEKEÇILER MEYDANÇASY – 2026» HAKATON BÄSLEŞIGINIŇ ÝEŇIJILERI
Berkarar döwletiň täze eýýamynyň Galkynyşy döwründe, Hormatly Prezidentimiz Arkadagly Gahryman Serdarymyzyň baştutanlygynda ýurdumyzda sanly ykdysadyýeti ösdürmek, ýaşlaryň innowasion başarnyklaryny we telekeçilik ukyplaryny kämilleşdirmek döwlet syýasatynyň ileri tutulýan ugurlarynyň biridir. Türkmen halkynyň Milli Lideri Gahryman Arkadagymyzyň we Hormatly Prezidentimiziň ýaş nesillere bolan ynamyndan ugur alyp, ýokary okuw mekdeplerinde döwrebap bäsleşikler yzygiderli guralýar.
Şu nukdaýnazardan, ýakynda Halkara Senagatçylar we Telekeçiler uniwersiteti tarapyndan ýurdumyzyň ýokary okuw mekdepleriniň talyplarynyň arasynda «Ýaş telekeçiler meydançasy – 2026» atly Hakaton bäsleşigi üstünlikli geçirildi. Bu çäre ýaşlaryň çalt we netijeli pikirlenmek, innowasion tehnologiýalary ulanmak hem-de döredijilikli telekeçilik taslamalaryny taýýarlamak başarnyklaryny ýüze çykarmaga gönükdirildi.
Türkmenistanyň Daşary işler ministrliginiň Halkara gatnaşyklary institutynyň talyplary Allanur Şyhyýew we Nurýagdy Haljanow döredijilikli pikiri, innowasion we çalt çözgütleri hödürlemek ukyby bilen tapawutlanmagy başardylar. Ýokary baha mynasyp bolan Allanur Şyhyýew I derejeli diplom, Nuryagdy Haljanow bolsa III derejeli diplom bilen sylaglandylar.
«Biziň beýik geljegimiz bilimli, giň gözýetimli, innowasion tehnologiýalary kämil özleşdirýän ýaşlarymyz bilen berk baglydyr» diýen paýhasly ýörelgeden ugur alyp guralan bu bäsleşik, ýurdumyzda sanly innowasiýalary we ýaş telekeçiligi täze sepgitlere ýetirmekde möhüm ädim boldy.
Leýli PIRIMKULYÝEWA,
Türkmenistanyň Daşary işler ministrliginiň
Halkara gatnaşyklar institutynyň
Halkara ykdysady gatnaşyklary
fakultetiniň 1-nji ýyl talyby