Garaşsyzlyk baýramyna bagyşlanan ylmy-amaly maslahat
2024-nji ýylyň 23-nji sentýabrynda Türkmenistanyň Daşary işler ministrliginiň Halkara gatnaşyklary institutynda mukaddes Garaşsyzlygymyzyň şanly 33 ýyllygy mynasybetli «Türkmenistanyň daşary syýasaty we diplomatiýasy: parahatçylyk, durnukly ösüş ugrunda hyzmatdaşlyk» atly ylmy-amaly maslahat geçirildi. Oňa ylmy jemgyýetçiligiň wekilleri, institutyň professor-mugallymlary, talyp ýaşlary, şeýle hem Ýaş diplomatlaryň mekdebiniň işjeň agzalary bolan mekdep okuwçylary hem işjeň gatnaşdylar.
Ylmy-amaly maslahatyň umumy mejlisinde «Garaşsyzlyk we ylym-bilimiň ösüş ýoly», «Bitarap Türkmenistanyň Birleşen Milletler Guramasy bilen strategiki hyzmatdaşlygy», «Diplomatiýada fransuz diliniň orny», «Türkmen-täjik söwda-ykdysady hyzmatdaşlygyny ösdürmegiň mümkinçilikleri» diýen temalar boýunça çykyşlar edildi. Çykyş edenler Garaşsyzlygyň bütin dünýäde belent abraýdan peýdalanýan, kuwwatly, okgunly ösýän döwletiň ygtybarly binýadyny emele getirendigini, geçen 33 ýylda demokratik, hukuk we dünýewi döwletimiziň esaslaryny pugtalandyrmak boýunça ägirt uly işleriň geçirilendigini buýsançly nygtadylar.
Umumy mejlisden soň, ylmy-amaly maslahat öz işini bölümçelerde dowam etdi. «Türkmenistanyň Garaşsyzlygy: halkara hyzmatdaşlygy ösdürmegiň giň mümkinçilikleri», «Garaşsyzlyk we özygtyýarlylyk — mizemez mukaddeslik», «Garaşsyzlyk ýyllarynyň ykdysady ösüşleri» hem-de «Magtymguly Pyragy we türkmen halkynyň garaşsyzlyk taglymaty» diýen bölümçelerde degişli temalar boýunça giňişleýin çykyşlara orun berildi. Bellenilişi ýaly, ata Watanymyz «Pähim-paýhas ummany Magtymguly Pyragy» ýylynda milli senenamamyzyň nobatdaky şanly senesini täze zähmet ýeňişleri bilen garşylaýar. Olaryň her biri Garaşsyz Türkmenistanyň ýyl ýazgysyna aýratyn sahypa bolup ýazylýar.
Şeýlelikde, şu gezekki ylmy-amaly maslahat giň gerime eýe bolýan Garaşsyzlyk baýramynyň dabaralary bilen özboluşly utgaşyp, talyp ýaşlaryň şanly senä bolan buýsanç duýgularyny artdyrdy. Ylmy-amaly maslahata gatnaşyjylar Gahryman Arkadagymyza hem-de hormatly Prezidentimize alkyş sözlerini beýan etdiler.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.