Durnukly ulagyň dostlary toparynyň ikinji ministrler maslahaty geçirildi
2024-nji ýylyň 27-nji noýabrynda Aşgabat şäheriniň «Arçabil» myhmanhanasynda «Halkara ulag-üstaşyr geçelgeleri: özara arabaglanyşyk we ösüş – 2024» atly halkara maslahatynyň we serginiň çäklerinde Durnukly ulagyň dostlary toparynyň ikinji ministrler maslahaty geçirildi.
Bu maslahata ýurdumyzyň ministrlikleriniň we ulag edaralarynyň ýolbaşçylary hem-de wekilleri, halkara we sebit guramalarynyň, esasan-da, Birleşen Milletler Guramasynyň ýöriteleşdirilen edaralarynyň ýolbaşçylary, Durnukly ulagyň dostlary toparyna agza ýurtlaryň diplomatik wekilhanalarynyň ýolbaşçylary we wekilleri, ulag pudagynyň bilermenleri, şeýle hem köpçülikleýin habar beriş serişdeleriniň wekilleri gatnaşdylar.
Maslahata gatnaşyjylar öz çykyşlarynda toparyň işini gowulandyrmagyň ähmiýetini, ulag we logistika meselelerini çözmek üçin tagallalary birleşdirmegi, sebit we global päsgelçilikleri azaltmagy we BMG agza döwletleriň ulag infrastrukturasynyň ösdürilmegi baradaky başlangyçlaryny goldamagy nygtadylar.
Maslahatyň ahyrynda oňa gatnaşyjylar ulag diplomatiýasyny ösdürmek, adamzada durnukly ulag mümkinçiliklerini elýeterli etmek ugrunda uly işleri durmuşa geçirýän Gahryman Arkadagymyza we hormatly Prezidentimize köp sagbolsun aýtdylar. Gahryman Arkadagymyzyň we Arkadagly Gahryman Serdarymyzyň janlarynyň sag, ömürleriniň uzak bolmagyny, alyp barýan il-ýurt bähbitli, umumadamzat ähmiýetli işleriniň rowaçlyklara beslenmegini arzuw etdiler.
Aýjahan GULHANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň IV ýyl talyby.