YKDYSATÇY TALYPLARYŇ YHLASLY ZÄHMETLERINIŇ NETIJESI
Türkmenistanyň Daşary işler ministrliginiň Halkara gatnaşyklary institutynyň talyplary ýurdumyzyň ýokary okuw mekdepleriniň arasynda geçirilýän ders bäsleşiklere, halkara zehin bäsleşiklerine, ylmy maslahatlara, sanly bilim tehnologiýalarynyň kömegi bilen halkara ylmy-döredijilik taslamalaryna işjeň gatnaşmak bilen ýokary üstünlikleri gazanýarlar.
«Türkmenistanda sanly bilim ulgamyny ösdürmegiň Konsepsiýasyny» we «Türkmenistanda 2019-2025-nji ýyllarda sanly ykdysadyýeti ösdürmegiň Konsepsiýasyny» durmuşa ornaşdyrmak hem-de zehinli ýaşlary ýüze çykarmak maksady bilen, 2024-nji ýylyň 13-nji martynda Türkmen döwlet ykdysadyýet we dolandyryş institutynyň gurnamagynda «Dünýä ykdysadyýeti» boýunça ýurdumyzyň ýokary okuw mekdepleriniň arasynda onlaýn ders bäsleşigi geçirildi.
Bäsleşigiň netijeleri boýunça institutymyzyň Halkara ykdysady gatnaşyklary fakultetiniň III ýyl talyplaryndan ybarat bolan topar, ýagny Ýupar Egirjäýewa I orna, Begendik Döwletýarow we Aýjahan Gulhanowa II orna, Batir Sadullaýew III orna mynasyp boldular. Maksada okgunly, ýokary taýýarlykly, giň gözýetimli, maglumat tehnologiýalaryny dolandyrmaga ukyply ýaşlarymyzyň üstünlik gazanmaklary ýurdumyzyň ýaşlar baradaky döwlet syýasatynyň netijeli durmuşa geçirilýänliginiň aýdyň nyşanydyr.
Mährijemal MÄMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň uly mugallymy.