“YKBALY HALA SIŇEN ZENANLAR” ATLY FOTO SERGISI GEÇIRILDI
2024-nji ýylyň 24-nji dekabrynda Türkmen halysynyň milli muzeýinde ÝUNESKO-nyň işleri barada Türkmenistanyň milli topary, “Türkmenhaly” döwlet birleşiginiň Türkmen halysynyň milli muzeýi we “El darak” hojalyk jemgyýeti bilen bilelikde “Ykbaly hala siňen zenanlar” atly foto sergisi geçirildi. Sergä Türkmenistanyň daşary ýurtlardaky diplomatik wekilhanalarynyň wekilleri, ýurdumyzyň ýokary okuw mekdeplerinde hereket edýän ÝUNESKO klublarynyň we kafedralarynyň işjeň agzalary, köpçülikleýin habar beriş serişdeleriniň wekilleri, tanymal halyçylar gatnaşdylar.
Serginiň açylyş dabarasynda ÝUNESKO-nyň işleri barada Türkmenistanyň milli toparynyň jogapkär sekretary Çynar Rüstemowa, “Türkmenhaly” döwlet birleşiginiň başlygy Akjemal Durdyýewa, “El darak” hojalyk jemgyýetiniň esaslandyryjysy Ogulgerek Durdyýewa dagy çykyş etdiler. Olar öz çykyşlarynda:« ÝUNESKO-nyň adamzadyň maddy däl medeni mirasynyň görnükli nusgalarynyň sanawyna girizilen el halyçylyk sungatyna hormat goýýan Gahryman Arkadagymyzyň we hormatly Prezidentimiziň saýasynda bu gün türkmen halysynyň şan-şöhraty dünýä ýaýylýar. Asyrlar aşyp ene-mamalarymyzdan dowam edip gelýän milli däp-dessurlary mynasyp dowam etdirmek, milli mirasymyzy geljekki nesillere ýetirmek biziň her birimiziň borjumyzdyr» diýip, buýsanç bilen bellediler.
Soňra sergä gatnaşyjylar mukaddeslige öwrülen ajaýyp sungaty döreden, çeper elli halyçy türkmen zenanlarynyň dürli ýyllardaky iş pursatlaryndan alnan suratlarynyň foto sergisini synladylar.
Jemile PÜRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti
kafedrasynyň uly mugallymy.