ÝATDAN ÇYKMAJAK GÜNLER
Ynsan durmuşynda aýratyn günler bolýar. Üstünde kalendaryň gatlary näçe geçse-de ýatdan çykmajak, ýüregiňde baky orun aljak ol günler öz süýjüligi, aýratyn lezzeti bilen ömrüňe ömür goşýar. Meniňem durmuşymdaky ýatdan çykmajak günleriň biri “alma-mater”, ýagny bilim ojagymyz bilen hoşlaşýan günümiz. Maňa türkmen diplomatiýasynyň milli mekdebi – Türkmenistanyň Daşary işler ministrliginiň Halkara gatnaşyklary institutynyň 2 gezek uçurymy bolmak nesip etdi. 5 ýyl bilim alan bilim ojagymyzda bu gezek Syýasy kommunikasiýa we internet žurnalistikasy ugry boýunça magistr derejesini alyp, uçurym bolmak bagty miýesser etdi. Bu şatlykly günde ýokary okuw mekdebini tamamlaýan uçurym talyplary, magistrleri tüýs ýürekden gutlaýaryn. Milli diplomatiýanyň ýokary mekdebinde alan bilimleri talyplaryň, magistrleriň geljekki zähmet ýolunda mynasyp miwesini bermegini arzuw edýärin. Bize bilim beren, öz zähmet tejribesini biz bilen paýlaşan halypa mugallymlarymyza, institutymyzyň ýolbaşçy düzümine hem öz minnetdarlygymy bildirýärin.
Halkymyzyň eşretli we bagtyýar durmuşda ýaşamagy, ýaşlaryň döwrebap bilim alyp, saýlap alan hünäri boýunça bilimlerini kämilleşdirip, ökde hünärmenler bolup ýetişmegi üçin ähli mümkinçilikleri döredip berýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, belent başlary aman bolsun!
Sona HALYKOWA,
Türkmenistanyň Daşary işler ministrliginiň
Halkara gatnaşyklary institutynyň
Syýasy kommunikasiýa we internet žurnalistikasy
magistr taýýarlygy ugrunyň uçurymy.