«Ýaş waspçy» atly döredijilik bäsleşiginiň ýeňijisi
Belent ösüşler ýolunda bedew bady bilen ynamly öňe barýan eziz Watanymyzyň Berkarar döwletiň täze eýýamynyň Galkynyşy döwrüniň «Arkadag Serdarly bagtyýar ýaşlar» ýylynda Türkmenistanyň Magtymguly adyndaky Ýaşlar guramasynyň Merkezi Geňeşiniň we «Arkadagly Ýaşlar» atly elektron žurnalynyň redaksiýasynyň bilelikde yglan etmeginde, ýurdumyzyň döredijilik bilen meşgullanýan ýaşlaryň arasynda geçirilen «Ýaş waspçy» atly döredijilik bäsleşiginiň çäginde žurnalyň onunjy sanynda çap edilen terbiýeçilik ähmiýetli makalasy üçin, Türkmenistanyň Daşary işler ministrliginiň Halkara gatnaşyklary Halkara hukugy fakultetiniň 4-nji ýyl talyby Umyt Annagylyjowa baýrakly 1-nji orna mynasyp boldy we «Arkadagly Ýaşlar» atly elektron žurnalynyň redaksiýasy tarapyndan taýýarlanan Hormat hatyna we gymmat bahaly sowgady bilen sylaglandy.
«Ýaş waspçy» atly döredijilik bäsleşigine hödürlenilen işler biri-birinden many aýratynlygy, çeperligi bilen tapawutlanýar. Bäsleşigiň ýeňijilerini kesgitlemek, iň gowy döredijilik eserlerini we awtorlary ýüze çykarmak eminler toparyna aňsat bolmady.
Ýeri gelende ýatlasak talybymyz Türkmenistanyň Magtymguly adyndaky Ýaşlar guramasynyň Merkezi Geňeşi hem-de «Adalat» gazetiniň redaksiýasy tarapyndan yglan edilen «Jan Watanym Türkmenistan» atly döredijilik bäsleşiginde hem baýrakly 1-nji orna mynasyp bolupdy.
Umyt Annagylyjowanyň nobatdaky ýeňşi türkmen diplomatiýasynyň ýokary mekdebi hasaplanýan Türkmenistanyň Daşary işler ministrliginiň Halkara gatnaşyklary institutynda talyplara diňe bir hünär bilimleriniň däl-de, döredijilik başlangyçlarynyň esaslaryny öwretmek, bu babatda ýardam bermek ýaly işleriň utgaşykly alnyp barylýandygyny görkezýär.
Biz hem talyp deň-duşumyz Umyt Annagylyjowa Gahryman Arkadagymyzyň, Arkadagly Serdarymyzyň parasatly baştutanlygynda döwrüň baýdak göterijileri hasaplanýan ýaşlara döredip berilýän mümkinçiliklerinden ýerlikli peýdalanyp, öz saýlap alan hünärinde diňe üstünlikleriň ýar bolmagy, geljekki döredijilik işlerinde zehiniň has-da ýiti bolmagyny arzuw edýäris.
Zülfiýa ÝAŇABAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň V ýyl talyby.