ÝAŞ TÜRGENIMIZIŇ NOBATDAKY ÝEŇŞI
2024-nji ýylyň 30-njy noýabrynda Germaniýanyň Hämnits şäherinde «Chemnitz Open 2024» sport ýaryşy geçirildi. Bu ýaryşa 5 sany ýurtdan 953 sany türgen gatnaşdy. Olar dürli ýaş kategoriýalarynda kata we kumite dissiplinalary boýunça bäsleşdiler. Bu ýaryşa Türkmenistanyň ýygyndy toparynyň düzüminde 18 türgen, 7 emin we 2 sany tälimçi gatnaşyp, geçirilen ýaryşyň jemleri boýunça türkmen türgenleri 21 altyn, 12 kümüş we 12 bürünç, jemi 45 medala mynasyp boldular. Şeýle görkeziji bilen biziň pälwanlarymyz medallaryň umumy sany boýunça beýleki toparlardan ep-esli öňe geçmegi başardy.
Bu ýaryşda Türkmenistanyň Daşary işler ministrliginiň Halkara gatnaşyklary institutynyň 2-nji ýyl talyby Rasul Atajanowyň 2 altyn, 1 kümüş we 2 bürünç medal gazanmagy ýurdumyzyň halkara giňişligindäki üstünligine özboluşly goşant boldy.
Türkmen diplomatiýasynyň milli mekdebiniň talyby, deň-duşumyz Rasul Atajanowy sport ulgamynda gazanan ynamly ýeňişleri bilen tüýs ýürekden gutlap, oňa geljekde okuwlarynda we sport äleminde uly üstünlikleriň ýar bolmagyny tüýs ýürekden arzuw edýäris!
Dawut GEZEROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň II ýyl talyby.