«ÝAŞ DIPLOMATLAR» YLMY GURNAGYNYŇ GURAMAGYNDA SÖHBETDEŞLIK GEÇIRILDI
2026-njy ýylyň 22-nji aprelinde Türkmenistanyň Daşary işler ministrliginiň Halkara gatnaşyklary institutynda Halkara gatnaşyklary we diplomatiýa kafedrasynyň «Ýaş diplomatlar» ylmy gurnagy tarapyndan Aşgabat şäherindäki Annanyýaz Artyk adyndaky ýöriteleşdirilen 68-nji orta mekdebiniň okuwçylary bilen «Türkmen diplomatiýasynyň görnükli wekilleri» atly söhbetdeşlik geçirildi.
Okuw sapagyny Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, Türkmenistanyň Adatdan daşary we Doly ygtyýarly ilçisi, «Türkmenistanyň ussat diplomaty» diýen tapawutlandyryş nyşanynyň eýesi, halypa diplomat Sapar Kömekowiç Berdiniýazow alyp bardy. Mugallym öz çykyşynda türkmen diplomatiýasynyň taryhy we häzirki ýagdaýy barada gürrüň berdi, şeýle-de mekdep okuwçylaryna ýurdumyzyň hem-de dünýäniň taryhy maglumatlaryny öwrenip, bilimlerini artdyrmagy maslahat berdi.
Çykyşyň ahyrynda mekdep okuwçylary özlerini gyzyklandyrýan sowallar bilen halypa diplomata ýüzlendiler we täsir galdyryjy jogaplary aldylar.
Allanazar SARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby.