TÜRKMENISTANYŇ SÖWDA TOPLUMYNYŇ SERGISI GEÇIRILÝÄR
2024-nji ýylyň 3-nji aprelinde Türkmenistanyň Söwda-senagat edarasynda Türkmenistanyň Söwda toplumyna bagyşlanylan sergi öz işine başlady. Sergide ýurdumyzyň öňdebaryjy senagat ulgamynyň, söwda hem-de hyzmatlar pudagynyň, milli senetçiligiň, haly önümçiliginiň öndürýän bäsdeşlige ukyply harytlary görkezilýär.
Serginiň açylyş dabarasy aýdym-sazly medeni çykyşlara beslendi. Onuň barşynda hormatly Prezidentimiz Serdar Berdimuhamedowyň Türkmenistanyň Söwda toplumynyň sergisiniň öz işine başlamagy mynasybetli iberen Gutlag haty serginiň işine badalga berdi.
Her ýylda geçirilmegi asylly däbe öwrülen sergi ýurdumyzyň hususy pudagynyň alyp barýan öndürijilikli hem-de döwrebap işini köpçülige ýetirmekde, alyjylar köpçüligini täze önümler bilen tanyşdyrmakda, şeýle-de söwda-ykdysady gatnaşyklarda işewürlik hyzmatdaşlygynyň täze ugurlarynyň açylmagyna giňden ýardam eder. Bu giň gerimli sergi 5-nji aprele çenli öz işini dowam eder.
Begendik DÖWLETÝAROW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby.