TÜRKMEN DIPLOMATIÝASYNYŇ MILLI MEKDEBINE 15 ÝYL
2023-nji ýylyň 20-nji martynda Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebiniň döredilmeginiň 15 ýyllygy mynasybetli maslahat geçirildi. Maslahata Türkmenistanyň Daşary işler ministrliginiň wekilleri, halypa diplomatlar, institutyň professor-mugallymlary, magistrantlary we talyp ýaşlar gatnaşdylar.
Türkmenistanyň halkara bileleşiginde has-da artýan işjeňligini göz öňünde tutup, ýurdumyzyň diplomatik gullugy üçin kämil hünärmenleri taýýarlamagyň we kämilleşdirmegiň bitewi ulgamyny döretmek, daşary syýasat we halkara gatnaşyklary babatda işleýän döwlet edaralaryny ýokary hilli hünärmenler bilen üpjün etmek, şeýle hem halkara gatnaşyklarynyň we häzirki zaman dünýäsiniň ösüşiniň düýpli meseleleri boýunça ylmy-barlag işlerini alyp barmak maksady bilen Türkmenistanyň Prezidenti 2008-nji ýylyň 20-nji martynda Türkmenistanyň Daşary işler ministrliginiň Halkara gatnaşyklary institutyny döretmek hakynda Permana gol çekdi.
Maslahatda çykyş edenleriň belleýşi ýaly, geçen 15 ýylyň içinde diplomatiýanyň bu ýokary okuw mekdebi Türkmenistanyň milli hünärmenleri taýýarlaýan bütewi ulgamynda özüniň mynasyp ornuny eýeledi. Institutyň uçurymlary Daşary işler ministrliginiň ulgamynda, hukuk goraýjy edaralarynda, ykdysady we maliýe toplumynda, Türkmenistanyň Telewideniýe, radiogepleşikler we kinematografiýa baradaky Döwlet komitetinde, şäher we welaýat gazet redaksiýalarynda, we beýleki edara-kärhanalarda zähmet çekýärler. Häzirki wagtda okuwuny göreldeli tamamlan uçurymlarymyzdan ençemesi institutyň öz çäklerinde hem üstünlikli işleýärler.
Geçen döwrüň içinde ýokary okuw mekdebiniň düzümi has-da kämilleşdirildi. Türkmenistanyň Prezidentiniň çözgüdi esasynda institutyň düzüminde Durnukly ösüş maksatlary boýunça ylmy-usulyýet merkezi, Türkmenistanyň diplomatiýasynyň möhüm ugurlary boýunça okuw merkezi, Strategik barlaglar boýunça ylmy merkezi, Ýaş diplomatlaryň mekdebi hem-de Sanly ulgamlar we kommunikasiýa bölümi açyldy.
Çykyş edenleriň bir agyzdan belleýşi ýaly, Gahryman Arkadagymyzyň başlangyjy bilen döredilen Halkara gatnaşyklary instituty häzirki zaman ýokary bilim ulgamynyň hem-de diplomatiki binýatlyk ýörelgelerine daýanmak bilen birlikde, öňdebaryjy dünýä tejribesini hem hemmetaraplaýyn özleşdirýär. Institutda giň möçberli halkara hyzmatdaşlygyny hem alnyp barylýar. Türkmenistanyň Daşary işler ministrliginiň Halkara gatnaşyklary instituty dünýäniň ençeme ýurdunyň Diplomatiýa akademiýalary we halkara gatnaşyklary ugrunda hünärmenleri taýýarlaýan meşhur uniwersitetleri bilen özara hyzmatdaşlyk hakynda resminamalara gol çekdi.
2011-nji ýylyň 1-nji sentýabrynda Gahryman Arkadagymyzyň gatnaşmagynda ýurdumyzyň milli diplomatiýa mekdebiniň täze binalar toplumy açylyp, ulanmaga berildi. Bu bilimler köşgüniň açylyş dabarasynda eden çykyşynda Gahryman Arkadagymyz institutymyzyň talyplaryna ýüzlenip, olaryň üstüne halkara bileleşiginde Türkmenistana wekilçilik etmek ýaly belent hem jogapkärli wezipäniň ýüklenýändigini aýratyn nygtap, munuň üçin olaryň kämil hünärmen bolup ýetişmelidigini belledi.
Maslahatyň ahyrynda oňa gatnaşyjylar türkmen diplomatiýasynyň milli mekdebiniň kemala gelmegi we berkemegi babatda edýän aladalary üçin Türkmen halkynyň Milli Lideri, Gahryman Arkadagymyza, hormatly Prezidentimize tüýs ýürekden sagbolsun aýtdylar we Gahryman Arkadagymyzyň, hormatly Prezidentimiziň janlarynyň sag, başlarynyň dik bolmagyny, milli we umumadamzat bähbitli oňyn başlangyçlarynyň, uzak geljege gönükdirilen tutumly işleriniň elmydama rowaç bolmagyny arzuw etdiler.
Gülälek ÇOPANOWA,
Türkmenistanyň Daşary işler
ministrliginiň Halkara gatnaşyklary
institutynyň mugallymy.
https://www.atavatan-turkmenistan.com/halkara-gatnasyklary-institutynyn-doredilmeginin-15-yyllygyna-bagyslanan-maslahat/?ISCI=060902
https://salamnews.tm/section/ylym-bilim/bilim/su-gun-halkara-gatnasyklary-institutynyn-doredilenine-15-yyl-dolyar-c49c53