Talybymyz — Şa serpaýyna mynasyp boldy
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 4-nji ýyl talyby Amangeldi Ýegenowyň Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň ýeňijisi bolmagy institutymyz üçin uly buýsançly waka boldy. Ýaş žurnalistiň döredijilik ýolunda gazanan bu uly üstünligi onuň yhlasly zähmetiniň, döredijilik gözlegleriniň, saýlap alan hünärine bolan söýgüsiniň we täzeçil başlangyçlarynyň mynasyp netijesidir.
Amangeldi Ýegenow žurnalistikanyň dürli ugurlary bilen bir hatarda, dokumental kino sungatyna, milli taryhymyzy we medeni mirasymyzy häzirki zaman tehnologiýalarynyň mümkinçilikleri arkaly açyp görkezmäge aýratyn gyzyklanma bildirýär. Ol taýýarlanylýan döredijilik işlerinde häzirki zaman sanly tehnologiýalaryň, şol sanda emeli aňyň mümkinçiliklerinden peýdalanyp, halkymyzyň şöhratly taryhyny, beýik şahsyýetleriň ömür ýoluny we milli gymmatlyklarymyzy döwrebap görnüşde tomaşaçylara ýetirmek ugrunda döredijilikli zähmet çekýär.
Talyp deň-duşymyzyň şeýle abraýly bäsleşikde ýeňiji bolmagy diňe bir onuň şahsy üstünligi bolman, eýsem, institutymyzyň, halypa mugallymlarynyň, talyp ýaşlarynyň hem üstünligidir. Sebäbi her bir üstünligiň aňyrsynda irginsiz zähmet, deň-duşlaryň ýardamy, halypa mugallymlaryň goldawy bar.
Türkmenistanyň mukaddes Garaşsyzlygynyň şanly 35 ýyllygynyň öňüsyrasynda gazanylan bu üstünlik has-da aýratyn many-mazmuna eýedir. Ýaşlaryň döredijilik başlangyçlaryna, bilim almagyna, öz ukyp-başarnyklaryny açyp görkezmegine döredilýän giň mümkinçilikleriň netijesinde ýaş nesliň wekilleri dürli ugurlarda ýokary netijeleri gazanýarlar. Amangeldi Ýegenowyň Türkmenistanyň Prezidentiniň «Türkmeniň Altyn asyry» atly baýragyna mynasyp bolmagy hem, şeýle mümkinçiliklerden netijeli peýdalanýan ýaşlaryň döredijilik üstünlikleriniň aýdyň mysallarynyň biridir. Biz talyp deň-duşymyzyň bu ýokary üstünligine tüýs ýürekden buýsanýarys. Onuň gazanan ýeňşiniň geljekde has uly döredijilik üstünlikleriniň, täze dokumental taslamalaryň, täsirli žurnalistik eserleriň başlangyjy boljakdygyna ynanýarys.
Talyp deň-duşymyzy bu ýokary sylag bilen tüýs ýürekden gutlaýarys we oňa okuwynda, döredijilik ýolunda mundan beýläk-de uly üstünlikleri arzuw edýäris!
Aýsona AMANJAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 4-nji ýyl talyby