JAN WATANYM TÜRKMENISTAN ASUDALYK DILLERINDE
Berkarar döwletiň täze eýýamynyň Galkynyşy döwründe Arkadag Serdarly bagtyýar ýaşlar ýylynda ýaşlaryň döredjilik başlangyçlaryny goldamak, ukyp-başarnygyny açyk görkezmek ugrunda netijeli işler durmuşa geçirilýär. Munuň aýdyň mysaly hökmünde ýaňy-ýakynda Türkmenistanyň Magtymguly adyndaky Ýaşlar guramasynyň Merkezi Geňeşi hem-de «Adalat» gazetiniň redaksiýasy bilen bilelikde Berkarar döwletiň täze eýýamynyň Galkynyşy döwründe mähriban Watanymyzda gazanylýan üstünlikleri giňden wagyz etmek, ýurdumyzyň hukuk goraýjy edaralarynda işleýän ýaş hünärmenleriniň, hukuk hünäri boýunça okaýan talyplaryň ukyp-başarnyklaryny ýüze çykarmak we olaryň döredijiliklerini kämilleşdirmek maksady bilen yglan edilen «Jan Watanym Türkmenistan» atly döredijlik bäsleşigini görkezip bileris. Bu döredijilik bäsleşigine Düzgünamada hem görkezilişi ýaly, ýurdumyzyň hukuk goraýjy edaralarynda işleýän ýaş hünärmenler, ýokary okuw mekdeplerinde hukuk hünäri boýunça okaýan talyplar uly ruhubelentlik bilen gatnaşdylar.
«Jan Watanym Türkmenistan» atly döredijilik bäsleşigine hödürlenilen işler biri-birinden many aýratynlygy, çeperligi bilen tapawutlanýar. Bäsleşigiň ýeňijilerini kesgitlemek, iň gowy döredijilik eserlerini we awtorlary ýüze çykarmak eminler toparyna aňsat bolmady. Çekeleşikli bäsleşikde beýleki dörediji ýaşlardan tapawutlanyp Türkmenistanyň Daşary işler ministrliginiň Halkara gatnaşyklary Halkara hukugy fakultetiniň 4-nji ýyl talyby Umyt Annagylyjowa baýrakly 1-nji orna mynasyp boldy. Bäsleşigiň beýleki ýeňijileri bilen birlikde göreldeli talybymyz Türkmenistanyň Magtymguly adyndaky Ýaşlar guramasynyň Merkezi Geňeşi hem-de «Adalat» gazetiniň redaksiýasy tarapyndan taýýarlanan Hormat haty we gymmat bahaly sowgatlar bilen sylaglandy. Institutyň çäginde we beýleki ylym-bilim, döredijilik bäsleşiklerine işjeň gatnaşyp, guwandyryjy netijeleri gazanýan Umyt Annagylyjowanyň nobatdaky ýeňşi türkmen diplomatiýasynyň ýokary mekdebi hasaplanýan Türkmenistanyň Daşary işler ministrliginiň Halkara gatnaşyklary institutynda talyplara diňe bir hünär bilimleriniň däl-de, döredijilik başlangyçlarynyň esaslaryny öwretmek, bu babatda ýardam bermek ýaly işleriň utgaşykly alnyp barylýandygyny görkezýär.
Biz hem talyp deň-duşumyz Umyt Annagylyjowa Gahryman Arkadagymyzyň, Arkadagly Serdarymyzyň parasatly baştutanlygynda döwrüň baýdak göterijileri hasaplanýan ýaşlara döredip berilýän mümkinçiliklerinden ýerlikli peýdalanyp, öz saýlap alan hünärinde diňe üstünlikleriň ýar bolmagy, geljekki döredijilik işlerinde zehiniň has-da ýiti bolmagyny arzuw edýäris.
Beggeldi GUTLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň IV ýyl talyby