IKITARAPLAÝYN HYZMATDAŞLYK HAS-DA BERKIDILÝÄR
2025-nji ýylyň 26-njy noýabrynda Türkmenistanyň Daşary işler ministrliginiň Halkara gatnaşyklary institutynda Malaýziýanyň Türkmenistandaky Adatdan daşary we Doly ygtyýarly ilçisi Mohd Suhaimi bin Ahmad Tajuddiniň gatnaşmagynda okuw sapagy geçirildi. Okuw sapagy türkmen-malaýziýa gatnaşyklarynyň ösüşine bagyşlandy. Oňa institutyň rektory Gülşat Ýusupowa we talyp ýaşlary gatnaşdylar.
Bu okuw sapagy türkmen diplomatiýasynyň milli mekdebiniň talyplarynyň diplomatiýa bilen bagly bilim derejelerini has-da kämilleşdirmek maksady bilen geçirildi. Sapagyň dowamynda çykyş eden ilçi Türkmenistanyň we Malaýziýanyň arasyndaky diplomatik gatnaşyklaryň ähli ugurlarynda hyzmatdaşlygyň has-da ösýändigini we giňelýändigini belläp geçdi şeýle-de bilim, sport, syýahatçylyk we oba hojalyk, dokma, ýeňil senagat ulgamlaryny goldamak boýunça amala aşyrylýan bilelikdäki taslamalaryň hem-de maksatnamalaryň işjeňleşýändigini nygtady.
Okuw sapagynyň ahyrynda talyplar hormatly ilçä Türkmenistan bilen Malaýziýanyň arasyndaky dostlukly we özara bähbitli hyzmatdaşlygy ösdürmegiň geljegi baradaky sowallary berdiler we bu ugurda özara pikir alyşdylar.
Aýgözel AMANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.