ILÇI BILEN GEÇEN DUŞUŞYK
2026-njy ýylyň 8-nji maýynda Türkmenistanyň Daşary işler ministrliginiň Halkara gatnaşyklary institutynda Azerbaýjan Respublikasynyň Türkmenistandaky Adatdan daşary we Doly ygtyýarly ilçisi Gismat Gozalow bilen duşuşyk geçirildi. Oňa institutyň professor-mugallymlary we talyp ýaşlary gatnaşdylar.
Okuw sapagynyň öňüsyrasynda iki döwletiň syýasy gatnaşyklaryna bagyşlanan sergi gurnaldy. Soňra Azerbaýjan Respublikasynyň Türkmenistandaky Adatdan daşary we Doly ygtyýarly ilçisi «Türkmenistan-Azerbaýjan: doganlyk we strategik hyzmatdaşlyk gatnaşyklary» atly tema boýunça okuw sapak geçdi. Hormatly ilçi iki ýurduň arasyndaky syýasy-diplomatik, söwda-ykdysady, medeni-ynsanperwer ugurlar boýunça ýetilen sepgitler we durmuşa geçirilen işler barada, şeýle hem özüniň baý iş, durmuş tejribesi hakda gyzykly gürrüňleri berdi.
Okuw sapagynyň ahyrynda talyplar özlerini gyzyklandyrýan sowallar bilen ýüzlendiler. Bu okuw sapagy türkmen diplomatiýasynyň milli mekdebinde bilim alýan ýaş halkaraçy hünärmenleriniň bilimlerini has-da artdyrmaga ýardam etdi.
Güldäne AHMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 2-nji ýyl talyby