ITALIÝALY WEKIL BILEN GEÇIRILEN OKUW SAPAGY
2026-njy ýylyň 11-nji iýunynda Türkmenistanyň Daşary işler ministrliginiň Halkara gatnaşyklary institutynda Italiýa Respublikasynyň Aziýa institutynyň (ISIA) baş sekretary Domeniko Palmieriniň gatnaşmagynda okuw sapagy geçirildi. Oňa institutyň professor-mugallymlary we talyp ýaşlary gatnaşdylar.
Domeniko Palmieri öz çykyşynda türkmen-italýan hyzmatdaşlygyň diňe bir ykdysady we energetika pudaklarynyň däl, eýsem, ylym-bilim, medeniýet hem-de ynsanperwer ugurlarynyň hem işjeň ösdürilýändigini aýratyn nygtady. Şol sanda Italiýa Respublikasynyň Aziýa institutynyň alyp barýan işleri barada giňişleýin gürrüň berdi. Italiýa Respublikasynyň Aziýa instituty Italiýa bilen Aziýa yklymynyň döwletleriniň arasynda syýasy, ykdysady, medeni we ylmy gatnaşyklary ösdürmäge gönükdirilen abraýly institutdyr. Ol Ýewropa bilen Aziýanyň arasynda özboluşly “köpri” bolup hyzmat edýär. Institutyň hünärmenleri Aziýa sebitindäki geosyýasy ýagdaýlar, halkara gatnaşyklarynyň ösüş we howpsuzlyk meseleleri boýunça ylmy-seljeriş işlerini, barlaglary alyp barýarlar.
Okuw sapagynyň ahyrynda talyp ýaşlar hormatly myhmana özlerini gyzyklandyran sowallary berdiler. Myhman institutyň geljekki halkaraçy hünärmenleri taýýarlamak babatyndaky işine ýokary baha berip, talyp ýaşlara okuwlarynda üstünlikleri arzuw etdi.
Okuw sapagy tamamlanandan soň institut boýunça tanyşlyk geçirildi. Myhman türkmen diplomatiýasynyň taryhy muzeýi bilen tanyşdyryldy. Gezelenç hormatly myhmanlarda ýakymly täsir galdyrdy. Bu çäre iki ýurduň arasyndaky dostlukly gatnaşyklary berkitmekde we diplomatik tejribe alyşmakda möhüm ähmiýete eýe boldy.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby