Durnukly şäherleri gurmakda ýaşlaryň ornuna bagyşlanan okuw sapagy geçirildi
2026-njy ýylyň 28-nji aprelinde Türkmen döwlet binagärlik-gurluşyk institutynda «Green Cities with Young Minds» atly okuw maslahaty geçirildi. BMG-niň Ösüş Maksatnamasynyň (BMGÖM) Türkmen döwlet binagärlik-gurluşyk instituty bilen bilelikde gurnamagynda geçirilen bu okuw sapagyna Türkmenistanyň Daşary işler ministrliginiň Halkara gatnaşyklary institutynyň hem-de ýurdumyzyň ähli ýokary okuw mekdepleriniň talyplary gatnaşdylar.
Bu okuw sapagy Türkmenistanyň şähergurluşyk pudagyndaky täze ösüşleri nazara alyp, ýaşlaryň ekologik düşünjesini artdyrmaga we olaryň geljegiň ,,ýaşyl” hem-de ,,akylly” şäherlerini taslamaga taýýarlamaga gönükdirildi.
Okuw sapagy «Durnukly şäher geljegi üçin garaýyşlar» atly gepleşik bilen dowam etdi. Onda BMG-niň Ösüş Maksatnamasynyň taslamalar boýunça bilermeni Jemal Durdyýewa, ,,SARY Architects” kompaniýasynyň esaslandyryjysy we baş arhitektory Azat Saryýew, Howanyň üýtgemegi boýunça milli ýaşlar konferensiýasynyň Türkmenistandaky guramaçysy Gülşat Aýydowa, "White City Ashgabat" sosial media sahypasynyň esaslandyryjysy Leýli Garlyýewa dagy çykyş etdiler. Gepleşigiň dowamynda bilermenler we ýaşlar durnukly binagärlik, klimatyň üýtgemegine garşy göreşmek we sanly tehnologiýalar arkaly durnukly şäher konsepsiýalaryny wagyz etmek barada pikir alyşdylar.
Okuw sapagynyň ikinji bölegi interaktiw oýunlara we amaly işlere bagyşlandy. Gatnaşyjylar üçin guralan “Meniň durnukly şäherim” atly oýun olaryň bilelikde işlemek we çalt çözgüt kabul etmek ýaly başarnyklaryny ösdürmäge ýardam berdi.
Guralan bu okuw sapagy BMG-niň Durnukly Ösüş Maksatlary (DÖM 11, 13, 17) boýunça talyplaryň bilimini çuňlaşdyrmaga we olaryň halkara derejede öz pikirlerini beýan etmäge bolan ukyplaryny ýokarlandyrmaga giň mümkinçilik döretdi.
Aýlar JUMAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 2-nji ýyl talyby.