“Daşary ýurt dillerini okatmagyň häzirki zaman usullary” atly okuw-usuly maslahat
2022-nji ýylyň 11-nji iýunynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň guramagynda “Daşary ýurt dillerini okatmagyň häzirki zaman usullary” atly okuw-usuly maslahat geçirildi. Bu maslahata institutyň Dünýä dilleri kafedrasynyň we paýtagtymyzda ýerleşýän “Gujurly nesil” okuw merkeziniň mugallymlary gatnaşdylar. Türkmenistanda daşary ýurt dillerini okatmagy kämilleşdirmegiň Konsepsiýasyny durmuşa geçirmek maksady bilen daşary ýurt dilleriniň okadylyş aýratynlyklary barada geçirilen maslahatda Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň mugallymlary O.Hemzaýew, G.Halyýew, S. Nazarowa, şeýle-de, “Gujurly nesil” okuw merkeziniň iňlis dili mugallymy Ş. Ataýewa we şol merkeziň usulyýetçisi M. Amannyýazow çykyş etdiler.
Maslahata gatnaşyjylar daşary ýurt dillerini okatmagyň täze usullary we öňdebaryjy tejribeleri barada giňişleýin pikir alyşdylar. Maslahat örän gyzykly we täsirli geçdi. Daşary ýurt dillerini dürli ýaşdakylara öwretmegiň tärleri giňden ara alnyp maslahatlaşyldy. Dil sapaklarynda dürli oýunlaryň, sahnalaryň, ara alyp maslahatlaşmalaryň, çekişmeleriň guralyşy, aýdymlaryň, goşgularyň, kompýuterleriň, internet ulgamynyň, görkezme esbaplaryň we tehniki serişdeleriň ulanylyşy barada mugallymlar tejribe alyşdylar.
Häzirki wagtda, daşary ýurt dillerini bilmezden, kämil derejeli hünärmen bolup ýetişmek mümkin däl. Çünki XXI asyr adamzat taryhynda ylym-bilimiň we tehnikanyň örän çalt depginler bilen ösýän zamanasydyr. Hormatly Prezidentimiziň aýratyn tagallasy bilen ýurdumyzda ylym-bilim ulgamy döwrüň ösen talaplaryna laýyk derejede toplumlaýyn we sazlaşykly ösdürilýär. Bilim ulgamyndaky özgertmeleriň oňyn netijeleri ýurdumyzyň ykdysady we medeni ösüşlerinde, halkymyzyň intellektual derejesiniň artmagynda has-da aýdyň görünýär.
Batyr KAIROW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.