HORMATLY PREZIDENTIMIZIŇ «TÜRKMENISTANYŇ BITARAPLYGY — PARAHATÇYLYGYŇ WE YNANYŞMAGYŇ AÝDYŇ ÝOLY» ATLY KITABYNYŇ ÝAPON DILINDÄKI NEŞIRINIŇ TANYŞDYRYLYŞ DABARASY
2026-njy ýylyň 26-njy oktýabrynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimiz Serdar Berdimuhamedowyň «Türkmenistanyň Bitaraplygy — parahatçylygyň we ynanyşmagyň aýdyň ýoly» atly kitabynyň ýapon dilindäki neşiriniň tanyşdyrylyş dabarasy geçirildi. Oňa Türkmenistanyň Bilim ministriniň orunbasary Azat Ataýew, şeýle hem daşary döwletleriň we halkara guramalaryň Türkmenistandaky diplomatik wekilhanalarynyň, ýurdumyzyň daşary syýasat edarasynyň işgärleri, halypa diplomatlar, ýokary okuw mekdepleriň professor-mugallymlary, talyp ýaşlar gatnaşdylar.
Mälim bolşy ýaly, hormatly Prezidentimiziň «Türkmenistanyň Bitaraplygy ― parahatçylygyň we ynanyşmagyň aýdyň ýoly» atly kitaby 2025-nji ýylda giňden bellenen Türkmenistanyň hemişelik Bitaraplygynyň 30 ýyllygy mynasybetli çapdan çykypdy. Kitapda Birleşen Milletler Guramasynyň Baş Assambleýasy tarapyndan üç gezek ykrar edilen hemişelik Bitaraplygymyzyň ähmiýeti, dünýäde parahatçylygy we ynanyşmagy üpjün etmäge gönükdirilen taryhy başlangyçlar giňden beýan edilip, ýurdumyzda ýetilen belent sepgitleriň, gazanylan üstünlikleriň jemi jemlenýär.
Tanyşdyrylyş dabarasynyň başynda institutynyň prorektory Gaýgysyz Döwletow giriş sözi bilen çykyş edip, hormatly Prezidentimiziň ýapon diline terjime edilen bu kitabynyň hemişelik Bitaraplygymyzyň gadyr-gymmatyny giňden açyp görkezýändigini, bu eseriň ýaş nesiller, şol sanda geljekki halkaraçy hünärmenler üçin hem ylmy-edebi gollanma boljakdygyny buýsanç bilen belledi.
Tanyşdyrylyş dabarasynyň dowamynda Türkmenistanyň Bilim ministriniň orunbasary Azat Ataýewiň, Ýaponiýanyň Türkmenistandaky Adatdan daşary we Doly ygtyýarly Ilçisi Sasaki Hirosiniň, Döwletmämmet Azady adyndaky Türkmen milli dünýä diller institutynyň rektory Maksat Çaryýewiň, Ýapon Gaznasynyň ýapon dili hünärmeni, maslahatçy-mugallym Iwai Ýufunyň, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň mugallymy Rahym Akmuradowyň, Döwletmämmet Azady adyndaky Türkmen milli dünýä dilleri institutynyň magistranty Gözel Myratgulyýewanyň çykyşlaryna giň orun berildi.
Maslahatda çykyş edenler Türkmenistanyň Prezidenti hormatly Serdar Berdimuhamedowyň «Türkmenistanyň Bitaraplygy — parahatçylygyň we ynanyşmagyň aýdyň ýoly» atly kitabynyň ýapon dilindäki neşiriniň ýokary ähmiýetini nygtadylar. Munuň özi Türkmenistanyň we Ýaponiýanyň arasynda däp bolan dostlukly gatnaşyklaryň ösüşinde nobatdaky möhüm ähmiýetli waka boldy. Şunda bu ajaýyp eseriň parahatçylyk söýüjilige ýugrulan hemişelik Bitaraplyk ýörelgelerimiziň köklerini öwrenmekde bir ýurdumyzyň okyjylary üçin däl, eýsen, dünýä jemgyýetçili üçin hem ygtybarly ylmy gollanma bolup aýratyn orun aljakdygy aýratyn bellenildi.
Çykyşlarda nygtalyşy ýaly, özara hoşniýetli erk-islegiň netijesinde döwletara dialog täze mazmun bilen baýlaşdyrylýar. Ynsanperwer ulgam däp bolan hyzmatdaşlygyň möhüm ugry hökmünde çykyş edýär. Şunda ylym, bilim, medeniýet ulgamlaryndaky gatnaşyklaryň köpýyllyk tejribesi we uly mümkinçilikleri bar. Şunuň bilen baglylykda«Türkmenistanyň Bitaraplygy ― parahatçylygyň we ynanyşmagyň aýdyň ýoly» atly kitabyň ýapon dilindäki neşiri «Günüň dogýan ýurdunyň» okyjylaryna hemmetaraplaýyn aladalara aýratyn ähmiýet berýän Türkmenistanyň döwlet syýasatynyň esasy ugurlary, türkmen Bitaraplygynyň taryhy, halkara gatnaşyklaryndaky orny bilen giňişleýin tanyşmaga mümkinçilik berer.
Tanyşdyrylyş dabarasyna gatnaşyjylar «Türkmenistanyň Bitaraplygy ― parahatçylygyň we ynanyşmagyň aýdyň ýoly» atly kitabynyň ýapon dilindäki neşiriniň çapdan çykmagy mynasybetli Gahryman Arkadagymyzy, Arkadagly Gahryman Serdarymyzy tüýs gutlap, döredip berýän mümkinçilikleri üçin hoşallyk bildirdiler.
Ogulsuraý MEREDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby
Bu barada şu ýerde hem okap bilersiňiz: