DAŞARY SYÝASATA BAGYŞLANAN DUŞUŞYK
2023-nji ýylyň 20-23-nji noýabry aralygynda Türkmenistanyň Daşary işler ministrliginiň Halkara gatnaşyklary institutynyň mugallymlar we talyplar toparynyň Birleşen Arap Emirliklerindäki okuw sapary dowam edýär. Okuw saparynyň çäklerinde göz öňünde tutulan meýilnama esasynda 21-nji noýabrda Anwar Gargaş adyndaky diplomatik akademiýasynyň hünärmeni Halkan Alsuwaid talyplara halkara hyzmatdaşlygy we daşary syýasat, ýurtlaryň arasyndaky diplomatik gatnaşyklary pugtalandyrmakdaky taryhy tejribe, diplomatiýanyň şu günki orny, BAE-niň syýasy gurluşy barada okuw sapagyny geçdi. BAE bilen Türkmenistanyň arasyndaky diplomatik gatnaşyklaryň taryhy, şu günki ýagdaýy baradaky aýdylanlar has-da täsirli boldy. Halkara gatnaşyklarynyň ösüşi, globallaşma hadysalary ilkinji nobatda, häzirki zaman diplomatiýanyň häsiýetine täsir edýär. Bu bolsa öz gezeginde diplomatiýanyň täze usullarynyň, gurallarynyň täzeçe çemeleşmegine getirýär. Şu häsiýetli çemeleşmeleriň ýüze çykmagy köptaraplaýyn diplomatiýanyň zerurlygyny artdyrýar. Şeýle-de, Anwar Gargaş adyndaky diplomatik akademiýasynyň professory doktor Muhamad Olimat dünýädäki geosyýasy, geoykdysady ýagdaýyň döwletler üçin ähmiýetli tarapy barada gürrüň berdi. Okuw saparyň ikinji günündäki özleşdirilen maglumatlar talyplaryň daşary syýasat we diplomatiýa baradaky bilimlerini berkitmekde uly ähmiýete eýe boldy. Sapagyň ahyrynda talyplaryň gyzyklanýan temalary barada sorag-jogap alşyldy.
Merjen JUMAGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.