Arkadagymyzyň sapagynyň ähmiýetine bagyşlanan maslahat
2023-nji ýylyň 7-nji sentýabrynda Türkmenistanyň Daşary işler ministrliginiň gurnamagynda Türkmenistanyň Daşary işler ministrliginiň Halkara gatnaşyklary institutynda Bilimler we talyp ýaşlar güni mynasybetli Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň Arkadag şäheriniň Ruhyýet köşgünde geçiren umumy sapagynyň taryhy-syýasy ähmiýetini wagyz-nesihat etmek maksady bilen, «Gahryman Arkadagymyzyň döwletlilik taglymaty we Arkadagly Serdarymyzyň ýoly bilen ynamly – Öňe, öňe, diňe öňe, jan Watanym Türkmenistan!» atly maslahaty geçirildi. Oňa Türkmenistanyň Daşary işler ministrliginiň işgärleri, institutymyzyň talyp ýaşlary, professor-mugallymlary uly ruhubelentlik hem-de buýsanç bilen gatnaşdylar.
Maslahat Gahryman Arkadagymyzyň «Ömrümiň manysynyň dowamaty» atly kitaby boýunça taýýarlanan edebi-sazly kompozisiýa bilen başlandy. Bu maslahaty institutyň rektory Jumamyrat Gurbangeldiýew alyp bardy. Maslahatyň dowamynda Türkmenistanyň daşary işler ministriniň orunbasary Mähri Bäşimowanyň, institutyň okuw işleri boýunça prorektory Gülşat Ýusupowanyň, Türkmenistanyň Daşary işler ministrliginiň Sanly diplomatiýa bölüminiň başlygy A.Mommadowanyň, institutyň Halkara ykdysady gatnaşyklary kafedrasynyň uly mugallymy Perhat Çaryýewiň, Türkmenistanyň Daşary işler ministrliginiň Halkara guramalary departamentiniň II sekretary D.Çotbaýewiň, institutyň Halkara gatnaşyklary we diplomatiýa kafedrasynyň uly mugallymy A.Jumagulyýewiň, institutyň Halkara ykdysady gatnaşyklary hünäriniň 3-nji ýyl talyby, Durnukly ösüş maksatlarynyň Ýaş Ilçisi Ý.Egirjäýewanyň çykyşlary diňlenildi.
Maslahatda Gahryman Arkadagymyzyň umumy okuw sapagyna gatnaşan türkmen diplomatiýasynyň milli mekdebiniň talyp ýaşlarynyň çykyşlaryna-da orun berildi. Olar şeýle beýik bagtyň miýesser edendigi üçin juwan kalbyndan çykýan hoşallyk sözlerini aýtdylar. Edilen çykyşlarda Gahryman Arkadagymyzyň geçiren umumy okuw sapagynyň döwürleri, nesilleri, köňülleri birleşdirýän hakyda sapagyna öwrülendigi aýratyn nygtaldy.
Ählimize mälim bolşy ýaly, Bilimler we talyp ýaşlar gününde hormatly Arkadagymyzyň Arkadag şäheriniň Ruhyýet köşgünde geçiren umumy okuw sapagy ýaşlaryň ykbalynda möhüm waka boldy. Milli Liderimiziň 2023-2024-nji, täze okuw ýylynyň ilkinji gününde bagtyýar türkmen ýaşlaryna geçen umumy okuw sapagy çuňňur many-mazmuna baý bolup, ýaş nesillerimiziň her biriniň kalbynda ýakymly täsirleri galdyrdy hem-de olaryň baýramçylyk şatlygyny artdyrdy.
Maslahatyň soňunda oňa gatnaşyjylar güneşli Diýarymyzy bagtyýar nesilleriň iň arzyly arzuwdyr islegleriniň hasyl bolýan mekanyna öwren türkmen halkynyň Milli Lideri Gahryman Arkadagymyzyň, hormatly Prezidentimiziň janlarynyň sag, ömürleriniň uzak bolmagyny arzuw etdiler.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.