BAÝRAMÇYLYGA BAGYŞLANAN GEZELENÇ
2025-nji ýylyň 22-njy maýynda Türkmenistanyň Daşary işler ministrliginiň Halkara gatnaşyklary institutynyň ilkinji Zenanlar guramasynyň işjeň agzalarynyň gatnaşmaklarynda Türkmen halysynyň milli muzeýine gezelenç guraldy.
Türkmen halysynyň baýramçylygynyň öň ýanynda guralan gezelenjiň dowamynda talyp gyzlara haly nagyşlarynyň taryhy, adam saglygy üçin halylaryň peýdasy, haly dokamak sungatynyň biziň günlerimize gelip ýetmeginde zenanlaryň orny barada, şeýle-de eziz watanymyzda her ýylyň maý aýynyň soňky dynç gününde uludan bellenilýän Haly baýramy hakynda maglumatlar berildi. Gezelenjiň dowamynda bu ajaýyp muzeý dünýäniň çar künjeginden gelýän jahankeşdeleriň hem iň bir gelim-gidimli ýerine öwrülendigini muzeýiň hünärmenleri belläp geçdiler.
Türkmen durmuşynyň aýrylmaz bölegine öwrülen halylar tutuş adamzadyň medeni hazynasyna ägirt uly goşant goşan halkymyzyň gadymy sungatynyň ajaýyp ýadygärligidir.
Ajaýyp gezelençleriň yzygiderli guralmagy türkmen diplomatiýasynyň geljekki wekilleri bolan talyp ýaşlaryň ukyp-başarnyklarynyň açylmagyna ýetirýän täsiriniň uludygy bellärliklidir.
Gülöwser REJEPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby.