ZENAN – OJAGYŇ SÖÝESI
2022-nji ýylyň 28-nji ýanwarynda Türkmenistanyň Daşary işler ministrliginiň Halkara gatnaşyklary institutynda «Zenan – ojagyň söýesi» atly wagyz-nesihat duşuşygy geçirildi.
Türkmenistanyň Daşary işler ministrliginiň Halkara gatnaşyklary instituty bilen Türkmenistanyň Zenanlar birleşiginiň Merkezi Geňeşiniň bilelikde guramagynda geçirilen duşuşyga Türkmenistanyň Zenanlar birleşiginiň Merkezi Geňeşiniň işjeň agzasy, hormatly ene Ogulnabat Owlakowa we institutyň Jemgyýeti öwreniş ylymlary kafedrasynyň müdiri, filosofiýa ylymlarynyň kandidaty, uly mugallym Ogulgurban Ezimowa we institutyň talyp gelin-gyzlary, mugallymlary gatnaşdy.
Duşuşygyň dowamynda çykyş edenler gadymdan gelýän türkmeniň gelin-gyzyna mahsus milli ýörelgelerine, edim-gylymlaryna, urp-adatlaryna eýermegiň möhümdigini nygtadylar. Gyzlar geljekde maşgalanyň sütüni, diregi bolmaly, şonuň üçin olaryň terbiýesinde ene-mamalarymyzyň ündeýän millilik ruhuna ýugrulan gylyk-häsiýetleriniň bolmagynda milli el işlerimiz aýratyn orun eýeleýändigi barada myhman gürrüň berdi. Keşde çekmek, haly dokamak, kürtedir don biçmek, gaýma gaýamak ýaly el işlerimiz ösüp gelýän ýaş gyzlarymyzda zähmete bolan söýgüni döretmäge itergi berýär. Şeýle hem, çykyş edenler halal zähmet çekmegiň, maşgala ojagynyň agzybirligini gorap saklamakda zenanlaryň tutýan ornunyň uludygy barada belläp geçdiler.
Maral KARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
1-nji ýyl talyby.