Ýurdumyzda güýzki ählihalk bag ekmek dabarasy geçirildi
Berkarar döwletiň täze eýýamynyň Galkynyşy döwründe ýurdumyzy bagy-bossanlyga öwürmek, tokaý zolaklaryny döretmek we ekilen bag nahallaryna talabalaýyk ideg etmek maksady bilen, Türkmenistanda 2025-nji ýylyň 8-nji noýabrynda güýzki ählihalk bag ekmek dabarasy geçirildi. Bu asylly işe Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyplary hem işjeň gatnaşdylar. Munuň özi ýurdumyzy bagy-bossanlyga öwürmek boýunça maksatnamanyň üstünlikli durmuşa geçirilýändiginiň aýdyň subutnamasydyr.
Watanymyzda asylly däbe öwrülen ählihalk bag ekmek dabarasy her ýyl raýatlarymyzyň gatnaşmagynda uly baýramçylyk ruhunda geçirilýär. Her ýyl dürli görnüşli bag nahallarynyň ýüz müňlerçesi ekilýär. Olaryň ösüp ulalmagy bilen, türkmen topragy bagy-bossanlyga bürenip, halkymyzyň tebigata bolan söýgüsini has-da artdyrýar.
Ýurdumyzyň ähli ýerinde bag nahallaryny ekmek bilen bir hatarda, ozal ekilen hem-de boý alan baglara ideg etmek işleri hem geçirildi. Şunuň bilen baglylykda, ählihalk bag ekmek dabarasynda institutymyzyň mugallymlarydyr talyplary Türkmenistanyň Daşary işler ministrliginiň hem-de institutymyzyň çäklerinde bag nahallaryny oturtdylar. Şeýle-de ekilen bag nahallaryna talabalaýyk ideg işleri edildi. Ýokary ruhubelentlikde geçirilen ählihalk bag ekmek dabarasy ýurdumyzyň ähli künjeginde giňden ýaýbaňlandyryldy.
Ajaýyp NOBATOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň V ýyl talyby.