“Ýol hereketiniň howpsuzlygy–ömrümiziň rahatlygy” atly wagyz-nesihat çäresi geçirildi
2023-nji ýylyň 20-nji sentýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň hukuk goraýjy edaralarynyň işgärleri bilen “Ýol hereketiniň howpsuzlygy – ömrümiziň rahatlygy” atly wagyz-nesihat çäresi geçirildi. Oňa Türkmenistanyň Içeri işler ministrliginiň ýol gözegçilik gullugynyň wekilleri, Türkmenistanyň Döwlet gümrük gullugynyň wekili, Türkmenistanyň Kärdeşler arkalaşyklarynyň Milli merkeziniň wekili, şeýle hem, institutymyzyň mugallymlary we talyplary gatnaşdylar.
Türkmen halkynyň Milli Lideri Gahryman Arkadagymyzyň başlangyjy bilen 2013-nji ýylda badalga berlen “Ýol hereketiniň howpsuzlygy – ömrümiziň rahatlygy” atly şygar bilen geçirilýän bir aýlygyň dowamynda giň möçberli çäreler, wagyz-nesihat duşuşyklary geçirilýär. Ýokary derejede geçirilýän çärelerde her bir raýatyň howpsuzlygyny üpjün etmek, ýol hereketiniň düzgünlerini berjaý etmek barada giňişleýin düşündiriş işleri alnyp barylýar. Her ýylyň 1-nji sentýabryndan 30-njy sentýabry aralygynda geçirilýän bu çäreler ýol-ulag hadysalarynyň azalmagyna, raýatlarymyzyň rahat hem-de abadan durmuşyny üpjün etmäge gönükdirilendir.
Mälim bolşy ýaly, häzirki wagtda ýurdumyzdaky mekdep okuwçylarynyň, ýokary okuw mekdepleriniň talyplarynyň, edara-kärhanalaryň we jemgyýetçilik guramalaryň işgärleriniň ýoldaky hereketiniň köpelýändigini nazara alyp, bu çäräniň hem her bir adamyň, esasan-da, mekdep okuwçylarynyň we talyp ýaşlaryň köpçülik ýerlerinde we ýol hereketlerinde seresap bolmaklaryny we şahsy howpsuzlygyny üpjün etmegiň düzgünlerini öwretmekde wajypdyr. Şu maksatly geçirýän çäreleriň ýaşlary terbiýelemekdäki ähmiýeti uludyr.
Aknabat DURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby