Wagyz-nesihat duşuşygy geçirildi
2026-njy ýylyň 17-nji fewralynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimiziň: «Ýaş telekeçileri, ýaşlar kärhanalaryny höweslendirmek hem-de goldamak ýaşlar syýasatynyň esasy maksadynyň biridir» diýen ajaýyp sözlerinden ugur alyp, Berkarar döwletiň täze eýýamynyň Galkynyşy döwründe «Garaşsyz, baky Bitarap Türkmenistan ̶ bedew batly at-myradyň mekany» ýylynda ýaşlary telekeçilige çekmek, olara başlangyç goldaw bermek hem düşünjelerini giňeltmek ugrunda alnyp barylýan işleri wagyz etmek maksady bilen, wagyz-nesihat duşuşygy geçirildi.
Duşuşygyň dowamynda TMÝG-niň Merkezi geňeşiniň ýanyndaky Maglumat maslahat beriş we meýletinçilik hereketiniň işleri boýunça Merkeziniň Telekeçiligi ösdürmek boýunça baş geňeşçisi, «Ygtybarly ädim» hususy kärhanasynyň esaslandyryjysy Rahymberdi Kerimow, Türkmenistanyň Senagatçylar we telekeçiler partiýasynyň Aşgabat şäher komitetiniň wekili, «Ynamly ýolbelet» hojalyk jemgyýetiniň esaslandyryjysy Kadyrberdi Nurberdiýew, Türkmenistanyň Ylymlar akademiýasynyň Halkara ylmy-tehnologiýa parkynyň Täjirçilik inkubatory we telekeçiligi ösdürmek bölüminiň müdiri Baýramgeldi Beýikow dagylar çykyş etdiler. Olar öz çykyşlarynda ýaşlarda milli mirasymyza bolan sarpany kemala getirmek, telekeçilige bolan gyzyklanmany döretmek we olarda watansöýüjilik, edermenlik, arassa ahlaklylyk, halallyk, zähmetsöýerlik ýaly häsiýetleri terbiýelemek maksady bilen, durmuşdan alnan mysallary getirdiler. Şeýle hem çykyşlarda Arkadagly Gahryman Serdarymyzyň baştutanlygynda häzirki zaman türkmen jemgyýetinde ylymly-bilimli ýaş nesli kemala getirmek, olary milli ruhda terbiýelemek üçin alnyp barylýan işler barada hem aýratyn durup geçdiler.
Muhammet SÜLEÝMANOW,
Jemgyýeti öwreniş ylymlary kafedrasynyň
mugallymy,
institutyň Ilkinji ýaşlar guramasynyň
başlygy.