Wagyz-nesihat duşuşygy geçirildi
2026-njy ýylyň 10-njy iýunynda Türkmenistanyň Daşary işler ministrliginiň Halkara gatnaşyklary institutynda talyp ýaşlaryň gatnaşmagynda wagyz-nesihat duşuşygy geçirildi. Oňa institutyň Kärdeşler arkalaşygynyň ilkinji guramasynyň başlygy Enejan Orazmyradowa, Türkmenistanyň Içeri işler ministrliginiň 4-nji bölüminiň wekili, Polisiýanyň maýory Meýlis Nurgeldiýew, Türkmenistanyñ Magtymguly adyndaky Ýaşlar guramasynyñ Aşgabat şäheriniň Berkararlyk etrap Geňeşiniň başlygy Ismail Ýakubow we institutymyzyň mugallymlary çykyş etdiler.
Duşuşykda çykyş edenler Türkmenistanyň hormatly Prezidenti Serdar Berdimuhamedowyň Garaşsyz, baky Bitarap Diýarymyzda sagdyn durmuş kadalaryny berjaý etmek boýunça alyp barýan döwlet syýasatyny üstünlikli durmuşa geçirmek, şeýle-de ýokary okuw mekdeplerinde uçurym bolýan talyp ýaşlaryň arasynda zyýanly endikleriň ýaramaz täsirini düşündirmek, olary durmuş ýoluna ugrukdyrmak, sagdyn durmuş we milli ahlak ýörelgelerini ýaýbaňlandyrmak, internet torlaryny dogry peýdalanmak, dogry maglumat paýlaşmak, köpçülik ýerlerinde özüňi alyp barmak barada giňişleýin belläp geçdiler.
Duşuşygyň dowamynda ýurdumyzda ýaşlar syýasatyny dabaralandyrmak, ýaş nesliň watansöýüjilik duýgusyny ösdürmek, häzirki zaman türkmen jemgyýeti üçin ylymly, bilimli, hünärine ussat ýaşlary kemala getirmek bilen baglanyşykly öňde durýan wezipeler babatynda edilen çykyşlar giň many-mazmuna eýe boldy.
Hojanýaz GUWANJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 2-nji ýyl talyby