TÜRKMEN WEKILIÝETI HALKARA MASLAHATA GATNAŞDY
2025-nji ýylyň 22 – 23-nji maý aralygynda Türkmenistanyň Daşary işler
ministrliginiň Halkara gatnaşyklary institutynyň, Magtymguly adyndaky Türkmen
döwlet uniwersitetiniň, Ýagşygeldi Kakaýew adyndaky Halkara nebit we gaz
uniwersitetiniň, Halkara ynsanperwer ylymlary we ösüş uniwersitetiniň,
Döwletmämmet Azady adyndaky Türkmen milli dünýä dilleri institutynyň,
Türkmen döwlet ykdysadyýet we dolandyryş institutynyň, Seýitnazar Seýdi
adyndaky Türkmen döwlet mugallymçylyk institutynyň wekilleri Hytaý Halk
Respublikasynyň Şensi prowinsiýasynyň Bilim departamenti tarapyndan Sian
şäherinde geçirilen “Ýüpek ýolunyň ugrunda senagat, bilim, gözleg we amaly
hyzmatdaşlyk – 2025” atly halkara maslahatyna gatnaşdylar.
Türkmen wekiliýeti çykyşlaryň dowamynda ýurdumyzyň we Hytaý Halk
Respublikasynyň bütin dünýäde parahatçylygy, howpsuzlygy hem-de durnukly
ykdysady ösüşi üpjün etmekde uly işleri durmuşa geçirýändiklerini, bu ugurda
ählumumy başlangyçlaryny öňe sürýändiklerini we türkmen ýaşlarynyň Hytaý
Halk Respublikasynyň birnäçe ýokary okuw mekdeplerinde dürli ugurlar boýunça
bilim alýandyklaryny belläp geçdiler.
Şeýle saparlaryň yzygiderli guralmagy ikitaraplaýyn hyzmatdaşlygy has-da
ösdürmekde we pugtalandyrmakda uly mümkinçilikleri döredýär.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.