Talyplaryň arasynda gyzykly geçen ýaryşlar
2023-nji ýylyň 24-nji aprelinde Türkmenistanyň Daşary işler ministrliginiň Halkara gatnaşyklary institutynyň hem-de Türkmenistanyň Senagatçylar we telekeçiler partiýasynyň bilelikde gurnamaklarynda “Arkadag Serdarly bagtyýar ýaşlar – sport, sagdyn durmuş baş ýörelgesi” şygary bilen sportuň küşt hem-de stol tennisi görnüşleri boýunça bäsleşik geçirildi. Oňa ýokary okuw mekdebimizde bilim alýan, akyl-paýhas oýny bolan küşte höwesjeň talyp gyzlaryň hem-de oglanlaryň birnäçesi gatnaşdylar.
Küşt ýaryşy toparlaýyn görnüşde geçirilip, onda gyzlar we oglanlar aýratynlykda özara ýaryşdylar. Çekeleşikli geçen bäsleşigiň netijesine görä, oglanlaryň arasynda Halkara gatnaşyklary fakultetiniň 2-nji ýyl talyby Azym Ýangibaýew garşydaşarynyň ählisinden üstün çykyp baýrakly birinji orna mynasyp boldy. Ikinji we üçünji orunlary bolsa, degişlilikde şol fakultetiň talyplary Nepes Durdyýew we Guwanç Serdarow eýelemegi başardylar. Gyzlaryň arasynda geçen ýaryşlar has hem gyzykly boldy. Netijede baýrakly birinji orna Halkara gatnaşyklary fakultetiniň 3-nji ýyl talyby Akgözel Rasulowa, 2-nji orna Halkara žurnalistikasy fakultetiniň 5-nji ýyl talyby Laçyn Hümmedowa, 3-nji orna bolsa Halkara ykdysady gatnaşyklary fakultetiniň 3-nji ýyl talyby Bilbil Berdiýewa mynasyp boldy.
Talyp oglanlaryň arasynda geçen stol tennis ýaryşy diýseň täsirli boldy. Bäsleşigiň netijelerine görä Halkara ykdysady gatnaşyklary fakultetiniň 3-nji ýyl talyby Şyhmyrat Söýünow 1-nji orna, Halkara gatnaşyklary fakultetiniň 2-nji ýyl talyby Kerim Baýmyradow 2-nji orna we Halkara ykdysady gatnaşyklary fakultetiniň 1-nji ýyl talyby Ahmet Muhanow 3-nji orna mynasyp boldular. Ýeňiji bolan talyplar Türkmenistanyň Daşary işler ministrliginiň Halkara gatnaşyklary institutynyň hem-de Türkmenistanyň Senagatçylar we telekeçiler partiýasynyň taýýarlan sowgatlary bilen sylaglandy.
Annagözel MEKANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.