Talyp ýigitleriň arasynda “Berkarar döwletiň täze eýýamynyň bagtyýar gerçekleri” atly döredijilik bäsleşigi geçirildi.
2024-nji ýylyň 30-njy aprelinde Türkmenistanyň Daşary işler ministrliginiň Halkara gatnaşyklary institutynda “Pähim-paýhas ummany Magtymguly Pyragy” ýyly hem-de Ýeňiş güni mynasybetli Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Türkmenistanyň Bilim ministrliginiň bilelikde guramagynda “Berkarar döwletiň täze eýýamynyň bagtyýar gerçekleri” atly döredijilik bäsleşiginiň institut tapgyry geçirildi. Oňa institutyň professor-mugallymlary we talyp ýaşlary gatnaşdylar.
Bu döredijilik bäsleşiginde Halkara gatnaşyklary fakultetiniň 1-nji ýyl talyby Sahydöwlet Hümmetjumaýew, Halkara hukugy fakultetiniň 1-nji ýyl talyby Resul Toýgulyýew, Halkara ykdysady gatnaşyklary fakultetiniň 1-nji ýyl talyby Dawut Gezerow, Halkara žurnalistikasy fakultetiniň 1-nji ýyl talyby Yhlas Hallyýew dagylar bäsleşdiler.
Bäsleşigiň birinji şerti boýunça talyp ýigitler özleriniň saýlap alan hünäriniň jemgyýetdäki ornuny çeper okaýyş bilen wasp etdiler.
Ikinji şert boýunça ýigitler öz başarnygyna görä “Pähim-paýhas ummany Magtymguly Pyragy” ýyly bilen baglanyşykly sungata we döredijilige bolan ukybyny görkezip, türkmen ýigidine mahsus bolan ruhybelentlik, edermenlik, mertlik, adalatlylyk häsiýetlerini açyp görkezmek üçin janly sesi bilen goşgulary hem-de sahna oýunlaryny ýerine ýetirdiler.
Bäsleşigiň soňky şerti boýunça talyp ýigitler ýekelikde şorta sözleri ýerine ýetirmek boýunça bäsleşdiler.
Emin agzalaryň gelen netijesine görä Halkara ykdysady gatnaşyklary fakultetiniň 1-nji ýyl talyby Dawut Gezerow “Berkarar döwletiň täze eýýamynyň bagtyýar gerçekleri” atly döredijilik bäsleşiginiň ýeňijisi diýip yglan edildi we jemleýji tapgyra gatnaşmaklyga hukuk gazandy.
Begli GURBANDURDYÝEW,
Türkmensitanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň öwreniji-mugallymy