Sanly wideoaragatnaşyk arkaly okuw maslahaty geçirildi
2022-nji ýylyň 4-5-nji oktýabry aralygynda Türkmenistanyň Daşary işler ministrligi bilen Ýewropada Howpsuzlyk we Hyzmatdaşlyk Guramasynyň (OSCE) Aşgabatdaky Merkeziniň guramagynda “Türkmenistanda adam hukuklary boýunça 2021-2025-nji ýyllar üçin Hereketleriň milli Meýilnamasyny durmuşa geçirmekde goldaw bermek” atly taslamanyň çäklerinde habar beriş serişdeleriniň erkinligini üpjün etmek boýunça sanly wideoaragatnaşyk arkaly okuw maslahaty geçirildi. Bu okuw maslahaty ÝHHG bilen bilelikde ýerine ýetirilýän ýyllyk meýilnamanyň çäklerinde milli habar beriş serişdeleriniň wekilleriniň žurnalistika ugurda hünär derejesini ýokarlandyrmak maksady bilen geçirildi. Oňa daşary ýurtly bilermenler bilen birlikde Türkmenistanyň Daşary işler ministrliginiň, Türkmenistanyň Döwlet, hukuk we demokratiýa institutynyň, Türkmenistanyň Milli Geňeşiniň Mejlisiniň, Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen Döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Döwlet habarlar agentliginiň hem-de ýurdumyzyň köpçülikleýin habar beriş serişdeleriniň wekilleri gatnaşdylar.
Okuw maslahatynyň dowamynda çykyş edenler köpçülikleýin habar beriş serişdeleriniň wekilleriniň hünär derejesini ýokarlandyrmagyň häzirki zaman maglumat jemgyýetiniň talaplaryny ýerine ýetirmekde aýratyn ähmiýetlidigini bellediler. Maslahatyň çäginde jemgyýeti dessine maglumatlandyrmakda sanly ulgamyň mümkinçiliklerini giňden peýdalanmak, galp maglumatlaryň ýaýradylmagynyň öňüni almak, ygtybarly çeşmelerden peýdalanmak barada pikir alyşmalar boldy. Maslahata gatnaşyjylar köpçülikleýin habar beriş serişdeleriniň wekilleriniň hünär derejesini kämilleşdirmegiň ýollary hakynda täsirli çykyşlary etdiler.
Aýnabat NAZAROWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.