PSIHOLOGIÝA – HALKLARY ÝAKYNLAŞDYRÝAN YLYM
2024-nji ýylyň 31-nji maýynda Türkmenistanyň Daşary işler ministrliginiň Halkara gatnaşyklary institutynda 1-nji iýun çagalary goramagyň halkara güni mynasybetli Jemgyýeti öwreniş ylymlary kafedrasynyň “Paýhas we parasat” ylmy gurnagynyň guramagynda “Psihologiýanyň we pedagogikanyň esaslary” dersinden 1-nji ýyl talyplarynyň arasynda “Psihologiýa – halklary ýakynlaşdyrýan ylym” atly bäsleşik we ylmy seminary geçirildi. Bäsleşige institutyň fakultetlerinden gurnagyň işjeň agzalary gatnaşdylar. Ylmy seminaryň dowamynda talyplar adam ýaşaýşyna täsir edýän faktorlaryň ähmiýetini ylmy esasda düşündirdiler.
Şeýle-de institutyň fakultetleri boýunça dört topar özaralarynda bäsleşdiler. Toparlar psihologiýanyň we pedagogikanyň bölümleri boýunça prezentasiýa bilen çykyş etmek, test soraglaryna, ýörite taýýarlanan soraglara jogap bermek ýaly bäsleşigiň şertleri boýunça ýaryşdylar. Çekeleşikli geçen bäsleşigiň jemleri boýunça I orna Halkara gatnaşyklary fakultetiniň 1-nji ýyl talyplaryndan düzülen topar, II orna Halkara hukugy fakultetiniň 1-nji ýyl talyplaryndan düzülen topar mynasyp boldular.
Bäsleşigiň ahyrynda ýeňijiler Türkmenistanyň Magtymguly adyndaky Ýaşlar guramasynyň Merkezi geňeşiniň sowgatlary bilen sylaglandylar.
Jennet GYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy
fakultetiniň I ýyl talyby.