Ýaş diplomatlaryň mekdebiniň agzalary bilen okuw sapagy geçirildi
2024-nji ýylyň 1-nji maýynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň «Lingvo World» ylmy gurnagy tarapyndan Ýaş diplomatlaryň mekdebiniň agzalary üçin «Ýylyň şygary — aýdyň geljegiň şam-çyragy» atly okuw sapagy geçirildi. Okuw sapagy rus we iňlis dillerinde alnyp baryldy.
Okuw sapagynyň dowamynda çykyş edenler ýylymyzyň «Pähim-paýhas ummany Magtymguly Pyragy» atly şygary hakynda giňden gürrüň etdiler. Hemmämiziň bilşimiz ýaly, ýurdumyzda 2024-nji ýylyň şygary Türkmenistanyň Halk Maslahatynyň Başlygy Gahryman Arkadagymyzyň Magtymguly Pyraga ýüzlenip döreden ajaýyp şygryndan gözbaş alýandyr. Magtymguly Pyragynyň 300 ýyllygy giňden bellenilýän ýylynda ýurdumyzda dünýä jemgyýeti bilen bilelikde geçirilýän dürli çäreler, forumlar, maslahatlar akyldar şahyrymyzyň döredijiligini çuňňur öwrenmekde aýratyn ähmiýete eýedir.
Okuw sapagynyň barşynda gatnaşyjylaryň arasynda iňlis dilinde wiktorina geçirildi. Onuň esasy maksady mekdep okuwçylarynyň dil bilimini, pikirleniş ukyplaryny kämilleşdirmekden ybarat boldy. Geçirilen okuw sapagynyň ahyrynda Magtymguly Pyragynyň goşgularynyň türkmen, rus hem-de iňlis dillerinde okalmagy diňleýjilerde üýtgeşik täsir galdyrdy.
Okuw sapagy tamamlanandan soňra mekdep okuwçylary üçin Türkmenistanyň Daşary işler ministrliginiň Halkara gatnaşyklary institutynyň içinde tanyşdyryş gezelenji guraldy. Gezelenjiň dowamynda olar institutyň muzeýine hem-de okuw studiýasyna baryp gördüler.
Enejan Orazmyradowa,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.