Parahatçylyk medeniýeti ― Nowruz baýramy
2025-nji ýylyň 20-nji martynda Türkmenistanyň Daşary işler ministrliginiň Halkara gatnaşyklary institutynyň «Ak öýünde» ÝUNESKO-nyň Adamzadyň maddy däl medeni mirasynyň sanawyna girizilen Halkara Nowruz güni mynasybetli institutyň «Parahatçylyk medeniýeti» atly ÝUNESKO klubunyň guramagynda «Parahatçylyk medeniýeti ― Nowruz baýramy» atly baýramçylyk dabarasy geçirildi.
Dabarada ilki bilen, Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa çykyş edip, gözbaşyny asyrlaryň jümmüşinden alyp gaýdýan, durmuşyň baky dowamatyny, hoşniýetliligi alamatlandyrýan Milli bahar baýramynyň — Halkara Nowruz gününiň çuň many-mazmuna eýedigini nygtady. Parahatçylygy, hoşniýetli goňşuçylygy we dostlugy, adamlaryň arasyndaky özara düşünişmegi pugtalandyrýan bu baýramyň ýokary ähmiýeti ÝUNESKO-nyň işleri barada Türkmenistanyň Milli toparynyň jogapkär sekretary, Türkmenistanyň Gahrymany Çynar Rustemowanyň çykyşynda hem aýratyn bellenildi.
Soňra institutyň «Parahatçylyk medeniýeti» atly ÝUNESKO klubunyň guramagynda «Halkara parahatçylyk we ynanyşmak ― durnukly ösüşiň binýady» atly makala bäsleşiginiň hem-de Bütindünýä şygryýet güni we ÝUNESKO-nyň Adamzadyň maddy däl medeni mirasynyň sanawyna girizilen Halkara Nowruz güni mynasybetli «Parahatçylyk medeniýeti ― Nowruz baýramy» atly döredijilik bäsleşiginiň ýeňijilerini sylaglamak dabarasy boldy. Ýeri gelende bellesek, bu bäsleşige ýurdumyzyň ýokary okuw mekdepleriniň ÝUNESKO kafedralarynyň we klublarynyň döredijilik bilen gyzyklanýan agzalarydyr talyp ýaşlary gatnaşdylar. Eminler topary hödürlenen makalalary seljerip, olaryň syýasy mazmunyna, ýazylyş ussatlygyna, derwaýyslygyna, çeperçiligine, terbiýeçilik ähmiýetine laýyklykda iň gowy makalalary saýlap, bäsleşigiň ýeňijilerini kesgitlediler. Ýeňijilere Hormat hatlary hem-de gymmatbahaly sowgatlar gowşuryldy.
Sylaglamak dabarasy institutyň çeper höwesjeňleriniň hem-de Maýa Kulyýewa adyndaky Türkmen milli konserwatoriýasynyň ýanyndaky Ýörite sazçylyk mekdep-internatynyň okuwçylarynyň taýýarlan çykyşlary bilen özboluşly utgaşdy. Belentden ýaňlanan aýdym-sazlaryň şirin mukamlary ýygnananlarda göwün göteriji ýagdaýy döretdi.
Bu dabara Garaşsyz Watanymyza, döwrümiziň belent döredijilik ruhuna bagyşlanandygyny, milli medeniýetimiziň iň gowy däpleriniň nesilden-nesle geçirilip kämilleşdirilýändigini nobatdaky gezek ähli aýdyňlygy bilen subut etdi. Baýramçylyk dabarasyna gatnaşyjylar halkymyzyň, mähriban Watanymyzyň bagtly eýýamyna, Gahryman Arkadagymyzyň hem-de Arkadagly Gahryman Serdarymyzyň tagallalary bilen röwşen geljege gadam urýan ýurdumyza bolan buýsanç duýgularyny beýan etdiler.
Jemile PÜRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň uly mugallymy.