Onlaýn sapaklar dowam edýär
2021-nji ýylyň 15-nji iýunynda Türkmenistanyň Daşary işler ministrliginiň Halkara gatnaşyklary institutynda “Türkiýe Respublikasynyň diplomatiýasynyň taryhy we onuň şu günki günde dowamy “ atly tema bagyşlanyp wideoaragatnaşyk ulgamy arkaly onlaýn okuw sapagy geçirildi. Türkmenistanyň daşary ýurtlardaky diplomatik wekilhanalarynyň ýolbaşçylarynyň geçirýän toplumlaýyn onlaýn sapaklarynyň çäginde guralan bu okuwa Türkmenistanyň Türkiýe Respublikasyndaky Adatdan daşary we Doly ygtyýarly ilçisi Işanguly Amanlyýew we Halkara gatnaşyklary institutyň talyplary gatnaşdylar.
Sapak ýokary okuw mekdebiniň talyplarynyň diplomatiýa bilen bagly bilim derejelerini has-da kämilleşdirmek maksady bilen geçirildi.
Okuw sapagynda çykyş eden hormatly ilçi Türkiýe Respublikasynyň taryhy, şol geçen taryhy döwürde alyp barlan diplomatiýa we onuň özboluşly aýratynlyklary hakynda gürrüň berdi. Şeýle hem ilçi Türkiýe Respublikasynyň geçen taryhy döwürde alyp baran diplomatiýasynyň özboluşlylygynyň onuň häzirki wagtdaky daşary syýasatynda we döwletler bilen özara gatnaşyklaryndaky täsiri hakda belläp geçdi. Ilçiniň jaýdar aýdyşy ýaly, Türkiýe Respublikasynyň we Türkmenistanyň özara gatnaşyklary aýratyn taryhy ähmiýete eýe bolup, şu günki dost-doganlyga we ynanyşmaga esaslanýan ikitaraplaýyn gatnaşyklaryň has-da ösdürilmeginde möhüm orun eýeleýär.
Duşuşygyň ahyrynda talyplar ilçä Türkmenistan bilen Türkiýäniň arasyndaky dostlukly we özara bahbitli hyzmatdaşlygy has-da ösdürmäge gönükdirilen sowallary berdiler we bu ugurda özara pikir alyşdylar.
Aýbölek Kakabaýewa,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.