Milli mirasymyza bagyşlanan gepleşik
2023-nji ýylyň 12-nji maýynda Türkmenistanyň Daşary işler ministrliginiň Halkara gatnaşyklary institutynyň Ak öýünde keşdeçilik sungatymyza bagyşlanan “Medeni mirasymyz ÝUNESKO-nyň sanawynda” atly dabaraly gepleşik ýazgy edildi. Oňa Türkmenistanyň Daşary işler ministrliginiň Halkara gatnaşyklary institutynyň zenan mugallymlary, talyp gyzlary we birnäçe myhmanlar gatnaşdy.
Dabarada Türkmenistanyň Döwlet medeniýet merkeziniň Döwlet muzeýiniň bölüm müdiriniň orunbasary Bahartäç Rüstemowa, Aşgabat şäheriniň ýaşaýjysy Türkmenistanyň Zenanlar bileleşiginiň Merkezi geňeşiniň işjeň agzasy Orazjemal Geldiýewa dagy türkmen halkynyň keşdeçilik sungatynyň ÝUNESKO-nyň Adamzadyň maddy däl medeni mirasynyň sanawyna girizilmegi, keşdeçilik sungatynyň milli medeni mirasymyzyň aýrylmaz bölegi bolup durýandygyny bellediler.
Dabaranyň dowamynda myhmanlar Arkadagymyzyň, Arkadagly Serdarymyzyň medeni mirasymyzy, milliligimizi, sungatymyzy, däp-dessurlarymyzy gorap saklamakda we ösdürmekde alyp barýan nusgalyk işleri barada giňişleýin gürrüň berdiler.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
ykdysady gatnaşyklary kafedrasynyň mugallymy,
institutyň ilkinji Zenanlar guramasynyň başlygy.