Merkezi Aziýanyň ýaş diplomatlary we döwlet gullukçylary üçin ikinji sebitleýin okuw maslahatynyň ýapylyş dabarasy
2026-njy ýylyň 13-nji martynda Türkmenistanyň Daşary işler ministrliginiň Halkara gatnaşyklary institutynda Merkezi Aziýanyň Ýaş diplomatlary we döwlet gullukçylary üçin guralan bäş günlük sebitleýin okuw maslahatynyň jemleýji gününde gatnaşyjylar üçin diplomatik gullugyň inçe syrlaryna bagyşlanan ýörite duşuşyklar we resmi ýapylyş dabarasy geçirildi.
“Diplomatiýa sungaty” (Art of diplomacy: meeting with Central Asian Diplomats) atly jemleýji duşuşykda Merkezi Aziýa ýurtlarynyň – Özbegistanyň, Gazagystanyň, Täjigistanyň we Gyrgyzystan Respublikasynyň Türkmenistandaky Adatdan daşary we Doly ygtyýarly ilçileri hem-de Türkmenistanyň Daşary işler ministrliginiň wekilleri ýaş diplomatlar bilen bir stoluň başynda ýygnandylar. Duşuşygyň dowamynda tejribeli diplomatlar sebitara hyzmatdaşlygyň häzirki ýagdaýy, ikitaraplaýyn we köptaraplaýyn gatnaşyklaryň ähmiýeti barada öz tejribelerini paýlaşdylar. Ýaş hünärmenler özlerini gyzyklandyrýan sowallar, esasan hem, sebitde durnuklylygy üpjün etmekde ýaş diplomatlaryň tutýan orny barada ilçiler bilen pikir alyşdylar. Bu duşuşyk ýaş hünärmenler üçin tejribeli halypalardan amaly maslahatlary almaga we sebit diplomatiýasynyň geljegine täzeçe garamaga mümkinçilik berdi. Okuw maslahatynyň ahyrynda, amaly sapaklaryň we ara alyp maslahatlaşmalaryň netijeleri jemlendi. “Parking lot/sorag-jogap we netijeler” bölüminde gatnaşyjylar okuwyň dowamynda öwrenen täze endikleri we geljekde amala aşyryp boljak bilelikdäki taslamalar boýunça öz garaýyşlaryny beýan etdiler.
Çäräniň resmi ýapylyş dabarasynda BMG-niň Türkmenistandaky Hemişelik utgaşdyryjysy jenap Dmitriý Şlapaçenko çykyş edip, “Siz diňe bir kämilleşmek bilen çäklenmän, eýsem, Merkezi Aziýanyň diplomatik maşgalasynyň bir bölegine öwrüldiňiz. Siziň araňyzda gurlan bu dostlukly gatnaşyklar geljekde sebitimiziň parahatçylygy we rowaçlygy üçin ygtybarly binýat bolar” diýip belledi. Şeýle-de, Türkmenistanyň Daşary işler ministriniň orunbasary Mähri Bäşimowa çykyş etdi we paýtagtymyzda geçirilen bu okuw maslahatynyň ähmiýetini nygtap, ýaş hünärmenleriň kämilleşmeginiň Türkmenistanyň daşary syýasatynyň ileri tutýan ugurlarynyň biridigini aýtdy.
Dabaranyň ahyrynda bäş ýurduň ýaş diplomatlaryna okuwy üstünlikli tamamlandyklary baradaky halkara şahadatnamalar gowşuryldy. Çäre okuw maslahatyna gatnaşyjylaryň ýadygärlik surata düşmek dabarasy bilen tamamlandy.
Bu okuw maslahaty gatnaşyjylaryň diplomatik gullukda hünär derejesini ýokarlandyrmaklaryna hem-de Merkezi Aziýa ýurtlarynyň arasyndaky goňşuçylyk we özara hormat goýmak ýörelgelerini has-da berkitmäge hyzmat etdi.
Maýa ATAJANOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy.