«MAGTYMGULYNYŇ DÖREDIJILIGINDE AHLAKLYLYK ÝÖRELGESI» ATLY WAGYZ-NESIHAT DUŞUŞYGY
2024-nji ýylyň 5-nji iýunynda Türkmenistanyň Daşary işler ministrliginiň Halkara gatnaşyklary institutynda ilkinji zenanlar we ilkinji ýaşlar guramasynyň bilelikde guramagynda «Magtymgulynyň döredijiliginde ahlaklylyk ýörelgesi» atly wagyz-nesihat duşuşygy geçirildi. Oňa institutyň professor-mugallymlary we talyp ýaşlary gatnaşdylar.
Wagyz-nesihat duşuşygynda Aşgabat şäheriniň 51-nji orta mekdebiniň mugallymy, Türkmenistanyň Zenanlar birleşiginiň Merkezi geňeşiniň işjeň agzasy Ogulnabat Owlakowa hem-de Aşgabat şäherinde ýerleşýän Türkmenbaşy dokma toplumynyň Magtymguly adyndaky ilkinji Ýaşlar guramasynyň başlygy Arslanmyrat Rejepmyradow dagy çykyş etdiler.
Duşuşygyň dowamynda myhmanlar türkmen halkynyň beýik ogly, Gündogaryň akyldary Magtymguly Pyragynyň eserleriniň ýaşlary terbiýelemekdäki, ýaş nesliň dünýägaraýşyny kemala getirmekdäki bahasyna ýetip bolmajak terbiýeçilik ähmiýeti dogrusynda gyzykly gürrüňleri berdiler. Şeýle-de Magtymgulynyň poeziýasynyň ahlak sapaklary ähli döwürde-de wajyp bolup durýandygyny, söýgi, dostluk, rehimdarlyk, ýagşylyk we ýamanlyk — bularyň ählisiniň akyldaryň eserlerinden eriş-argaç bolup geçýändigini nygtadylar.
Wagyz-nesihata gatnaşyjylar beýik söz ussady Magtymguly Pyragynyň edebi mirasyny bütin dünýäde dabaralandyrýan Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak bolmagyny arzuw etdiler.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy,
institutyň ilkinji Zenanlar guramasynyň başlygy.