KÜŞT ÝARYŞY GEÇIRILDI
Berkarar döwletiň täze eýýamynyň Galkynyşy döwründe «Pähim – paýhas ummany Magtymguly Pyragy» ýylynda Türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Gahryman Serdarymyzyň ýolbaşçylygynda ýurdumyzda köpçülikleýin bedenterbiýäni we sporty ösdürmäge uly üns berilýär.
2024-nji ýylyň 12-nji iýunynda Türkmenistanyň Daşary işler ministrliginiň Halkara gatnaşyklary institutynda talyp ýaşlaryň arasynda geçirilen sportuň küşt görnüşi boýunça «Berkarar döwletiň täze eýýamynyň Galkynyşy döwrüniň talyplary» atly bäsleşik hem munuň aýdyň subutnamasy boldy.
Bäsleşik örän gyzykly we çekeleşikli ýagdaýda geçip, gyzlaryň arasynda Halkara gatnaşyklary fakultetiniň talyplary I orna, Halkara žurnalistikasy fakultetiniň talyplary II orna, Halkara ykdysady gatnaşyklary fakultetiniň talyplary bolsa III orna mynasyp boldular.
Oglanlaryň arasynda geçirilen bäsleşikde bolsa Halkara ykdysady gatnaşyklary fakultetiniň talyplary I orna, Halkara hukugy fakultetiniň talyplary II orna, Halkara gatnaşyklary fakultetiniň talyplary III orna mynasyp boldular.
Bäsleşigiň maksady talyp ýaşlarda sagdyn durmuş ýörelgelerini ösdürmekden, olaryň sportuň dürli görnüşlerine bolan höweslerini artdyrmakdan ybarat boldy.
Bilşimiz ýaly, küşt oýny ynsanyň akyl – paýhasynyň kämilleşmeginde aýratyn ähmiýete eýedir. Alymlar küşt oýnamagyň beýniniň iki ýarym şaryny hem işjeňleşdirýändigini subut etdiler. Aleksandr Puşkin, Lew Tolstoý, Galileo Galileý, Dante Aligýeri, Wolter ýaly dünýä belli şahsyýetler hem küşt oýnamagy örän gowy görüpdirler.
Türkmen diplomatiýasynyň milli mekdebiniň talyp ýaşlarynyň arasynda şeýle sport bäsleşikleriniň yzygiderli geçirilmegi geljekki halkaraçy hünärmenleriň akyl – paýhas taýdan kämilleşmeklerine, olaryň okuwdan boş wagtlaryny peýdaly geçirmeklerine uly ýardam edýär.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.