ÝAŞ HUKUKÇYLARYŇ ARASYNDA REFERAT BÄSLEŞIGI GEÇIRILDI
Berkarar döwletiň täze eýýamynyň Galkynyşy döwründe ýurdumyz özüniň ösüş derejelerini barha ýokarlandyrýar. Arkadagly Gahryman Serdarymyzyň başlangyjy bilen, Türkmenistanda ýaşaýan her bir adamyň asuda, abadan durmuşyny üpjün etmek maksatly edilýän işleriň sany barha artýar. Şonuň netijesinde, her ýylyň sentýabr aýynda geçirilýän «Ýol hereketiniň howpsuzlygy — ömrümiziň rahatlygy» atly bir aýlygyň çäklerinde ýurdumyzyň görkana ýollarynda hereket howpsuzlygyny üpjün etmek boýunça wagyz-nesihat çäreleri, duşuşyklardyr maslahatlar geçirilýär. Muňa mysal edip, 2023-nji ýylyň 29-njy sentýabrynda Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň «Ýaş hukukçylar» ylmy gurnagy tarapyndan şol fakultetiň I ýyl talyplarynyň arasynda yglan edilen «Ýol hereketiniň belgileri, Türkmenistanyň awtoýollarynda ulanylýan ýol kadalary, jerime tablisasy we beýlekiler» atly referat bäsleşiginiň jemi jemlendi.
Bäsleşigiň Düzgünnamasyna laýyklykda, Halkara hukugy fakultetiniň I ýyl talyplary agzalan tema boýunça referatlaryň birnäçesi taýýarlap bäsleşige hödürlediler. Olardan I orna Şyhmämmet Mämmetamanow, II orna Aknabat Durdyýewa we III orna Begmuhammet Orazow mynasyp boldular.
Bäsleşige gatnaşanlar öz çykyşlarynda ýurdumyzda hereket edýän kadalaşdyryjy hukuk namalaryň Türkmenistanda ýaşaýan ýaşaýjylaryň bähbitlerine laýyklykda kabul edilýändigi barada belläp geçdiler. Kanuna laýyklykda, ýol hereketiniň howpsuzlygyny üpjün etmek çygrynda döwlet gözegçiliginiň amala aşyrylýandygy barada, şeýle hem jemgyýetimizde ýaş nesliň abadan we rahat durmuşda ýaşamaklary üçin birnäçe kada-kanunlaryň durmuşa geçirilýändigi nygtaldy.
Bu bir aýlygyň dowamynda ýurdumyzyň her bir künjeginde guramaçylykly we özboluşly täsirli çäreleriň, maslahatlaryň geçirilmegi bilen ýol hereketiniň düzgünleri, pyýada we sürüjiniň wezipeleri barada nygtalyp geçilmegi ösüp gelýän ýaşlar üçin edilýän tagallalaryň biridir. Asudalygyň, abadançylygyň mekany bolan ata Watanymyzda adamlaryň bagtyýar durmuşda ýaşamagy döwlet syýasatynyň ileri tutulýan ugurlarynyň biri hasaplanylýar.
Maksat ATABALOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.