IKITARAPLAÝYN HYZMATDAŞLYK HAS-DA BERKIDILÝÄR
2025-nji ýylyň 24-nji noýabrynda Türkmenistanyň Daşary işler ministrliginiň Halkara gatnaşyklary institutynda Gyrgyz Respublikasynyň Türkmenistandaky Adatdan daşary we Doly ygtyýarly ilçisi Azizbek Madmarowyň gatnaşmagynda okuw sapagy geçirildi. Okuw sapagy türkmen-gyrgyz gatnaşyklarynyň ösüşine bagyşlandy. Oňa institutyň professor-mugallymlary we talyp ýaşlary gatnaşdylar.
Bu okuw sapagy türkmen diplomatiýasynyň milli mekdebiniň talyplarynyň diplomatiýa bilen bagly bilim derejelerini has-da kämilleşdirmek maksady bilen geçirildi. Sapagyň dowamynda çykyş eden ilçi Türkmenistanyň we Gyrgyz Respublikasynyň arasyndaky gatnaşyklaryň, oba hojalyk we medeni-ynsanperwer ulgamlarynda ikitaraplaýyn we köptaraplaýyn hyzmatdaşlygyň has-da ösýändigini we giňelýändigini belläp geçdi. Bilim, sport we syýahatçylyk hem-de oba hojalyk, dokma, ýeňil senagat ulgamlaryny goldamak boýunça amala aşyrylýan bilelikdäki taslamalaryň hem-de maksatnamalaryň işjeňleşýändigini nygtady.
Okuw sapagynyň ahyrynda talyplar hormatly ilçä Türkmenistan bilen Gyrgyz Respublikasynyň arasyndaky dostlukly we özara bähbitli hyzmatdaşlygy baradaky sowallary berdiler we bu ugurda özara pikir alyşdylar.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.