Hyzmatdaşlygyň täze ugry
2022-nji ýylyň 19-njy maýynda Türkmenistanyň Daşary işler ministrliginiň Halkara gatnaşyklary institutynyň Türkmenistanyň diplomatiýasynyň möhüm ugurlary boýunça okuw merkezinde “Türkmenistanyň Prezidentiniň ulag diplomatiýasyny ösdürmegiň 2022-2025-nji ýyllar üçin Maksatnamasyny” durmuşa geçirmek boýunça Türkmenistanyň Daşary işler ministrliginiň Halkara gatnaşyklary institutynyň hem-de «Türkmen Logistika» Assosiasiýasy jemgyýetçilik birleşiginiň bilelikde 2022-2025-nji ýyllarda ýerine ýetirmeli işleriniň meýilnamasyny tassyklanyldy. Bu çärä institutyň talyp ýaşlary, mugallymlary bilen birlikde birleşigiň hünärmenleri hem gatnaşdylar.
Bilşimiz ýaly, 2020-nji ýylda esaslandyrylan «Türkmen Logistika» Assosiasiýasynyň häzirki wagtda 140-dan gowrak agzalary bolup, halkara hyzmatdaşlygynda Beýik Britaniýanyň we Demirgazyk Irlandiýanyň Birleşen Patyşalygynyň Logistika we Ulag Institutynyň Merkezi Aziýa boýunça wekilhanasy, Zenanlaryň logistika we ulag pudagyndaky Jemgyýetiniň Merkezi Aziýadaky wekilhanasy, Özbegistanyň Işewürlik Logistiki Ösüş Assosiasiýasynyň, Russiýa Federasiýasynyň Astrahan oblastynyň gämi eýeleriniň we ekspeditorlarynyň Sebit Assosiasiýasynyň, Gruziýanyň Ekspeditorçylyk Assosiasiýasynyň, Gazagystanyň ulag we logistika guramalarynyň we assosiasiýasynyň (birleşikleriniň) Arkalaşygynyň, Türkiýäniň Ekspeditorlarynyň we Logistika Hyzmatlaryny Ýerine Ýetirijileriniň Assosiasiýasynyň, Belarus Halkara Ekspeditorlaryň we Logistika Assosiasiýasynyň, Ukrainadaky Ulag, Ekspeditorçylyk we Logistika Guramalary bilen hyzmatdaşlygy alyp barýarlar.
Ikitaraplayýyn meýilnamanyň esasy maksady Türkmenistanyň Prezidentiniň ulag diplomatiýasyny ösdürmegiň meseleleri boýunça halkara hyzmatdaşlygyny alyp barmaga gönükdirilen başlangyçlaryny hem-de olaryň iş ýüzünde durmuşa geçirilişini çuňňur öwrenmek esasynda hünär öwreniş we hünär kämilleşdiriş maksatly okuwlary guramak bolup durýar.
Perhat ÇARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň uly mugallymy.