HYTAÝDA KHBS-IŇ HÜNÄRMENLERINIŇ SEMINARY ÖZ IŞINE BAŞLADY
2024-nji ýylyň 30-njy oktýabrynda Hytaý Halk Respublikasynyň paýtagty Pekin şäherinde Merkezi Aziýa döwletleriniň köpçülikleýin habar beriş serişdeleriniň hünärmenleriniň seminary öz işine başlady. Häzirki zaman dünýäsinde metbugatyň ösüş tendensiýalaryna bagyşlanan seminar Hytaýyň Söwda ministrliginiň hem-de Telewideniýe we radioýaýlym pudagyndaky halkara ykdysady we tehnologik hyzmatdaşlyk kompaniýasynyň guramagynda geçirilýär.
Seminara Merkezi Aziýa döwletleriniň wekilleri bilen bir hatarda, Türkmenistanyň wekiliýeti hem gatnaşýar. Has dogrusy, žurnalistika hünärine bagyşlanan seminara Türkmenistanyň Döwlet habarlar agentliginiň «Türkmenistan: Altyn asyr» elektron gazetiniň redaksiýasynyň, ýurdumyzyň daşary syýasat edarasynyň hem-de Halkara habarlar merkeziniň hünärmenleri wekilçilik edýärler.
Merkezi Aziýa döwletleriniň köpçülikleýin habar beriş serişdeleriniň hünärmenleriniň seminarynyň birinji gününde gatnaşyjylar sanlylaşan dünýäniň KHBS-iň işine ýetirýän täsiri we ýurtlaryň arasynda bolup geçýän wakalary dessin halka ýetirmekde žurnalistleriň orny barada pikir alyşdylar. Şeýle-de Hytaý Halk Respublikasynyň tele we radioýaýlymlarynyň alyp barýan işleri barada giňişleýin gürrüň edildi.
Seminar 12-nji noýabra çenli dowam eder.
Ogulmaýsa AMANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň
nazaryýeti we amalyýeti kafedrasynyň mugallymy,
seminara gatnaşyjy.