HALKARA ZENANLAR GÜNI MYNASYBETLI BAÝRAMÇYLYK DABARASY
2026-njy ýylyň 5-nji martynda Türkmenistanyň Daşary işler ministrliginiň Halkara gatnaşyklary institutynda Halkara zenanlar güni mynasybetli baýramçylyk dabarasy geçirildi. Oňa türkmen diplomatiýasynyň milli mekdebiniň professor-mugallymlary we talyp ýaşlary gatnaşdylar.
Dabarada Türkmenistanyň Daşary işler ministrliginiň Halkara gatnaşyklary institutynyň rektory G.Ýusupowa çykyş edip, ähli zenanlary ýetip gelýän Halkara zenanlar güni mynasybetli tüýs ýürekden gutlady. Baýramçylyk dabarasynda bellenilişi ýaly, hormatly Prezidentimiziň taýsyz tagallary bilen ýurdumyzda zenanlaryň durmuş üpjünçiligini kepillendirýän milli kanunçylyk ulgamy kemala getirildi. Häzirki wagtda döwletimiziň ähli pudaklarynda zenanlaryň halal zähmet çekip, Watanymyzyň ösüşlerine mynasyp goşant goşmaklary üçin ägirt uly mümkinçilikler döredilýär.
Berkarar döwletiň täze eýýamynyň Galkynyşy döwründe ýurdumyzda ýaş maşgalalary goldamak, ýaş hünärmenleriň, şol sanda zenanlaryň hünär derejesini ýokarlandyrmak, olaryň döwrebap bilim almaklary we dynç almaklary üçin şertleri döretmek babatda ähli zerur işler alnyp barylýar. Bilşimiz ýaly, Türkmenistan Birleşen Milletler Guramasynyň möhüm düzümleriniň ençemesiniň, şol sanda «BMG — Zenanlar» düzüminiň hem agzasy bolup durýar. Bularyň ählisi ýurdumyzyň Birleşen Milletler Guramasy we beýleki halkara guramalar bilen netijeli hyzmatdaşlyk etmek arkaly gender syýasaty ulgamyndaky anyk maksatlara gönükdirilen wezipeleriň oňyn çözülmegine jogapkärçilikli çemeleşýändiginiň aýdyň subutnamasydyr.
Dabaranyň dowamynda hormatly Prezidentimiziň adyndan institutyň zenan professor-mugallymlaryna hem-de talyp gyzlaryna pul sowgady dabaraly ýagdaýda gowşuryldy. Institutyň talyp ýaşlarynyň baýramçylyk mynasybetli taýýarlan daşary ýurt dillerindäki aýdym-sazly çykyşlary bolsa dabara ýakymly öwüşgin çaýdy.
Çäräniň ahyrynda ýurdumyzda zenanlaryň okamagy, öwrenmegi, halal zähmet çekmekleri üçin giň mümkinçilikleri döredýän, döwletimiziň halkara abraýyny barha belende galdyrýan Gahryman Arkadagymyza, Arkadagly Gahryman Serdarymyza hoşallyk sözleri beýan edildi.
Uzykjemal ARTYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby.