Halkara terjime gününe bagyşlanyp geçirilen akyl-paýhas bäsleşigi
2023-nji ýylyň 29-njy sentýabrynda Türkmenistanyň Daşary işler ministrliginiň Halkara gatnaşyklary institutynda Halkara terjime gününe bagyşlanan “Breýn-ring” atly akyl-paýhas bäsleşigi geçirildi. Oňa institutyň ähli fakultetleriniň talyplary gatnaşdylar we özleriniň iňlis dilinde bilim başarnyklaryny görkezdiler. Bäsleşigiň dowamynda talyplar nakyllary, frazeologizmleri we idiomalary terjime etmek bilen zehinlerini artdyrdylar. Çekeleşikli geçen bäsleşigiň netijelerine laýyklykda, Halkara gatnaşyklary fakultetiniň talyplary I orna, Halkara žurnalistikasy fakultetiniň talyplary II orna, Halkara hukugy fakultetiniň talyplary bolsa III orna mynasyp boldular.
Mälim bolşy ýaly, her ýylyň 30-njy sentýabrynda terjimeçileriň hünär baýramçylygy bolan Halkara terjime güni giňden bellenilýär. Bu halkara güni bellemeklik 1991-nji ýylda Terjimeçileriň halkara federasiýasy tarapyndan tassyklanyldy. 2017-nji ýylda BMG-niň Baş Assembleýasynyň 71-nji sessiýasynda Halkara terjimeçiler güni barada Rezolýusiýa guramanyň ähli döwletleri tarapyndan biragyzdan kabul edildi. Bu Rezolýusiýada dünýäde parahatçylygy üpjün etmekde, halklaryň arasynda özara düşünişmekligi ýola goýmaklykda terjimeçileriň ornunyň uludygy nygtalýar.
Maral KARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.