Halkara Bitaraplyk gününe bagyşlanan breýn-ring bäsleşigi geçirildi
2024-nji ýylyň 11-nji dekabrynda Türkmenistanyň Daşary işler ministrliginiň Halkara gatnaşyklary institutynda Halkara Bitaraplyk güni, Türkmenistanyň hemişelik Bitaraplygynyň 29 ýyllygy mynasybetli ýurdumyzyň ýokary okuw mekdepleriniň talyplarynyň arasynda breýn-ring bäsleşigi geçirildi. Bäsleşige Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Döwletmämmet Azady adyndaky Türkmen milli dünýä dilleri institutynyň talyplary toparlaýyn görnüşde gatnaşdylar. Bäsleşige gatnaşyjy toparlar öz aralarynda, her tapgyrda berlen sowallara kesgitlenen wagtda jogap bermek arkaly bäsleşdiler.
Bäsleşigiň maksady Berkarar döwletiň täze eýýamynyň Galkynyşy döwründe “Pähim-paýhas ummany Magtymguly Pyragy” ýylynda Türkmenistanyň Bitaraplyk syýasatyny giňişleýin öwrenmekden, bu ugurda halkara ykdysady ýagdaýlary ýokary okuw mekdepleriniň talyp ýaşlarynyň arasynda ýaýbaňlandyrmakdan, şeýle hem zehinli ýaşlary ýüze çykarmakdan, olaryň ylym-bilimlerini, ukyp-başarnyklaryny açyp görkezmekden, dünýägaraýyşlaryny artdyrmakdan ybaratdyr.
Bäsleşikde öňe saýlanan toparlar Türkmenistanyň Daşary işler ministrliginiň Halkara gatnaşyklary institutynyň adyndan degişli diplomlar we ýadygärlik sowgatlar bilen sylaglandylar.
Kadyrmyrat ÖWEZGYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.