«GAHRYMAN ARKADAGYŇ YLHAMYNDA PYRAGY» ATLY DÖREDIJILIK DUŞUŞYGY
2023-nji ýylyň 26-njy awgustynda Erkin döredijilik mekanynyň mejlisler zalynda «Edebiýat we sungat» gazetiniň we «Garagum» žurnalynyň redaksiýalarynyň guramagynda «Gahryman Arkadagyň ylhamynda Pyragy» atly aýdym-sazly döredijilik duşuşygy geçirildi. Oňa ýurdumyzyň ussat žurnalistleri, halypa ýazyjy-şahyrlary we ýokary okuw mekdeplerinde žurnalistika hünärinde bilim alýan talyp ýaşlar gatnaşdylar.
Bilşimiz ýaly, 2024-nji ýylda belleniljek türkmeniň akyldar şahyry Magtymguly Pyragynyň doglan gününiň 300 ýyllyk ýubileý toýy mynasybetli ýurdumyzyň dürli künjeklerinde döredijilik duşuşyklary, dabaraly maslahatlar yzygiderli geçirilýär. Duşuşygyň dowamynda çeper döredijilige aýratyn sarpa goýýan Gahryman Arkadagymyzyň Magtymguly Pyraga bagyşlap döreden täze goşgy setirleriniň hemmelere, hususan-da döredijilik işgärleri üçin ylham çeşmesine öwrülendigi, goşgynyň çeperçilik aýratynlygynyň ýokarydygy barada bellenilip geçildi. Halypa şahyrlar öz çykyşlarynda Gahryman Arkadagymyzyň täze goşgusynyň ýaş nesiller üçin mukaddes görelde, durmuş sapagydygy barada aýratyn nygtap geçdiler. Maýa Kulyýewa adyndaky Türkmen milli konserwatoriýasynyň guramagyndaky aýdym-sazly çykyş döredijilik duşuşygyna gatnaşanlara ruhy lezzet paýlady. Ussat žurnalistleriň, halypa ýazyjy-şahyrlaryň gatnaşmagynda geçirilen döredijilik duşuşygyna talyp ýaşlaryň gatnaşmagy geljekde ýurdumyzyň ösüşlerine, içeri we daşary syýasatyna özleriniň mynasyp goşandyny goşup biljek ýaş hünärmenleriň uly toparynyň kemala gelmeginde nobatdaky ädim bolar.
Döredijilik duşuşygynyň ahyrynda oňa gatnaşyjylar Magtymguly Pyragyny pähim-paýhas ummanyna deňeýän Gahryman Arkadagymyzyň, türkmen halkynyň bagtyýar durmuşda ýaşamagy üçin uly işleri durmuşa geçirýän Arkadagly Serdarymyzyň adyna alkyş sözlerini aýtdylar.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.